ជប៉ុន​ពិចារណា «គ្រប់ជម្រើស» ដើម្បីទប់ទល់ការហក់ឡើង​តម្លៃអង្ករក្នុងស្រុក

រដ្ឋាភិបាល​ជប៉ុន​បាន​និយាយនៅថ្ងៃសុក្រនេះថា ខ្លួនកំពុងពិចារណាលើ «គ្រប់ជម្រើស» ដើម្បីទប់ទល់នឹង​​ការហក់ឡើងខ្ពស់កប់ពពកនៃតម្លៃអង្ករក្នុងស្រុក រួមទាំងការបញ្ចេញអង្ករក្នុងស្តុក ១០០ ០០០ ដែលបម្រុងសម្រាប់គ្រាអាសន្ន និងការបង្កើនការនាំចូលលើសកូតា។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

​ការឱ្យដឹងនេះ ធ្វើឡើងខណៈអង្ករក្នុងស្រុកជប៉ុនកើនឡើងទ្វេដង ធៀ​ប​នឹង​រយៈពេលដូចគ្នា​កាលពីឆ្នាំំមុន ដែលបង្កជាកង្វល់ធំសម្រាប់​ប្រជាជនអ្នកប្រើប្រាស់ ក៏ដូចជាអ្នកបង្កើតគោលនយោបាយ ចំពេលការបោះឆ្នោតសំខាន់ខិតជិតមកដល់។

រហូតមកដល់ពេលនេះ រដ្ឋាភិបាលជប៉ុន បានកំណត់បរិមាណអង្ករប្រហែល ៦០០ ០០០ តោន សម្រាប់ការបញ្ចេញពីស្ដុកសម្រាប់គ្រាមានអាសន្នរបស់ខ្លួន ដើម្បីកាត់បន្ថយតម្លៃអង្ករលើទីផ្សារ។ ​ក្រសួងកសិកម្ម​ជប៉ុន លោក Shinjiro Koizumi បាននិយាយថា លោកបានត្រៀមខ្លួនរួចជាស្រេចក្នុងការ​បញ្ចេញអង្ករទាំងស្ដុក ឬ ៣០០ ០០០ តោន ទៀត តាមតម្រូវការ ប៉ុន្តែមិនទាន់ច្បាស់ទេ ថាតើវាត្រូវការប៉ុន្មានតោន ដើម្បីធ្វើឱ្យតម្លៃធ្លាក់ចុះ។ ​

លោក Koizumi បានប្រាប់សន្និសីទសារព័ត៌មានមួយថា៖ «ប្រសិនបើអ្នកក្រឡេកមើលផលិតផលផ្សេងទៀត (ការនាំចូលបន្ទាន់) គឺជាអ្វីដែល​យើងងាកទៅរក។ ជា​ឧទាហរណ៍ នៅពេល​ជំងឺគ្រុនផ្តាសាយបក្សីបណ្តាលឱ្យមាន​កង្វះខាតស៊ុត យើងបាននាំចូលពី​ប្រេស៊ីល​»។ សម្រាប់អង្ករ លោកនិយាយថា៖ «​ពិចារណាជម្រើសទាំងអស់ ដើម្បីសម្រេចបាននូវតម្លៃស្ថិរភាព»។

គួរគូសបញ្ជាក់ថា ដោយសារតម្លៃអង្ករក្នុងស្រុកបានឡើងថ្លៃ តម្រូវការអង្ករដែលមានតម្លៃថោក និង​នាំចូលពីបរទេសបានកើនឡើង​។ តម្លៃអង្ករនៅក្នុងផ្សារទំនើបរបស់ជប៉ុន ជាមធ្យម លក់នៅ ៤ ២៦០ យ៉េន (២៩,៦២ ដុល្លារ) ក្នុង ៥ គីឡូក្រាម ​ក្នុងសប្ដាហ៍គិតត្រឹមថ្ងៃទី ២៥ ឧសភា។ តម្លៃនេះខ្ពស់ជាងតម្លៃឆ្នាំមុនទ្វេដង៕ ​

​