ថៅកែបិតស្រា ស បង្ហាញ​បច្ចេកទេស​ចិញ្ចឹមជ្រូកកុំ​ឲ្យ​ប្រឈមការខាតបង់

ក្រៅពីរបរបិទស្រាស លោក ថត ណាគ្រី រស់នៅឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ នៅមានមុខរបរមួយផ្សេងទៀតនោះ គឺការចិញ្ចឹមជ្រូកបែបជាលក្ខណៈគ្រួសារ។

ដោយលោកយល់ឃើញថា របរបិទស្រា ក្រៅពីផលិតបានស្រាសហើយនោះ ក៏នៅមានកាកសំណល់បាយស្រាជាច្រើនទៀត ដែលអាចផ្គត់ផ្គង់ជាចំណីសត្វដល់ការចិញ្ចឹមជ្រូក និងមិនសូវចំណាយដើមទុនច្រើនទៅលើចំណី។

លោក ថត ណាគ្រី បានឲ្យដឹងថា របរចិញ្ចឹមជ្រូកនេះ សំខាន់បំផុតគឺចាប់ផ្ដើមចិញ្ចឹមពីតិចទៅច្រើន។ អ្នកខ្លះអត់ដឹងទេថា ការចិញ្ចឹមជ្រូក គឺមិនមែនចិញ្ចឹមភ្លាមបានភ្លាមនោះទេ។ បើសិនទិញមេជ្រូកមកចិញ្ចឹមយ៉ាងហោចណាស់ត្រូវប្រើរយៈពេលមួយឆ្នាំ ទើបទទួលបានផលថេរ។ ហើយកាលណាទិញកូនជ្រូកមកចិញ្ចឹមទម្រាំធំ ទម្រាំរកឈ្មោល ចិញ្ចឹមរយៈពេល ចន្លោះ​ពី ៧ ទៅ ៨ ខែ ទើបពេលល្អក្នុងការដាក់បា ដាក់បាបានរយៈពេល ១១៤ថ្ងៃ ទើបកូនជ្រូកកើត។ កូនជ្រូកកើតបាន​រយៈពេល ២៧ ថ្ងៃ ត្រូវបំបែកកូនជ្រូកចេញពីមេ ហើយត្រូវផ្ដល់ចំណីឲ្យវាស៊ីគ្រប់គ្រាន់ ក្នុងរយៈពេល ៤ខែ ទើបអាចចាប់លក់បាន។

ទន្ទឹមនឹងនោះ ប្រសិនបើប្រជាពលរដ្ឋចង់ចិញ្ចឹមជ្រូកដូចលោកដែរនោះ លោកក៏បានធ្វើការណែនាំយ៉ាងដូច្នេះថា ទីមួយត្រូវជ្រើសរើសប្រភេទពូជជ្រូក និងគួបផ្សំចិញ្ចឹមពីតិចទៅច្រើ។ បើសិនជាខ្វះខាតលុយ មិនចាំបាច់ខ្ចីលុយគេទេ បើអាចសុខចិត្តតស៊ូទៅស៊ីឈ្នួលគេឯណេះបន្តិចឯណោះ​បន្តិចយកលុយសន្សំ មកទិញកូនជ្រូកចិញ្ចឹមតិចៗយូរៗទៅជ្រូកនិងអាចកើនឡើង ព្រោះការចិញ្ចឹមជ្រូក កាលណាចាប់ផ្ដើមឡើងចិញ្ចឹមច្រើនតែម្ដង ពេលបរាជ័យ គឺជួបផលពិបាក ព្រោះជ្រូកងាយងាប់បំផុត។

កន្លងមក លោកក៏ធ្លាប់ជួបប្រទះបញ្ហាដូចគ្នា ហើយខាតបង់ថវិការហូតដល់ប្រមាណជា ២៣ លានរៀល ដោយកាលនោះ លោកបានទិញពូជជ្រូកពីខាងពីក្រុមហ៊ុន ទិញក្នុងតម្លៃមួយក្បាល ចំនួន ២ លានរៀល ក៏ព្រោះតែលោកខ្វះទាំងបទពិសោធន៍ ទាំងបច្ចេកទេស ទើបបណ្ដាលឲ្យជ្រូកទាំងអស់នោះងាប់។

តែយ៉ាងណាម៉ិញមកដល់ពេលនេះ បច្ចេកទេសក្នុងការចិញ្ចឹមជ្រូក លោកចេះចាក់ថ្នាំវ៉ាក់សាំង បង្ការជំងឺផ្សេងៗ ចេះក្រៀវជ្រូក និងបច្ចេកទេសថែទាំជ្រូក តាមរយៈមើលនិងរៀនពី youtube ដោយខ្លួនឯង។ លោកបានបន្តឲ្យដឹងថា សព្វថ្ងៃនេះ ជ្រូករបស់លោកមានចំនួនជាង ១០០ ក្បាល ចំណែកឯទីផ្សារជ្រូកវិញ ជ្រូកសាច់ លក់បានតម្លៃចន្លោះចាប់ពី ១២,០០០ រៀល ទៅ ១៣,០០០ រៀល ក្នុងមួយគីឡូឈ្មួញមកទិញដល់កន្លែង ហើយពេលខ្លះក៏មានប្រជាពលរដ្ឋក្នុងភូមិកម្មង់ជ្រូកខ្វៃ លោកក៏ខ្វៃជូនពួកគាត់ផងដែរ ព្រោះមានជ្រូកចិញ្ចឹមស្រាប់ មិនពិបាករកទិញពីគេ៕

អត្ថបទ៖ ប្រុញ វិធិន