កីឡាករ Yamamoto មានចលនាសង្គ្រោះបាល់លឿនដូចផ្លេកបន្ទោរ ជាប់ឈ្មោះជាស្តេចលីប៊ើរ៉ូ ជប៉ុន

ក្រុមបាល់ទះជម្រើសជាតិ ជប៉ុន ជាប់ឈ្មោះជាក្រុមជោគជ័យបំផុតមួយនៅក្នុងតំបន់ អាស៊ី ដោយសារពួកគេសម្បូរធនធានកីឡាករល្អៗច្រើន ហើយក្នុងនោះក៏មាន​កីឡាករ​ Tomohiro Yamamoto ដែលជាអ្នកលេងតួនាទីលីប៊ើរ៉ូម្នាក់ផងដែរ។

អ្នកគាំទ្រភាគច្រើន ស្គាល់តែឈ្មោះ Yuji Nishida និង Yuki Ishikawa ប៉ុណ្ណោះ នៅពេលនិយាយអំពីក្រុមជម្រើសជាតិជប៉ុន ប៉ុន្តែជាមួយគ្នានេះ Yamamoto ក៏មិនអាចមិនរំលងបានផងដែរ។ អ្នកគាំទ្រជប៉ុនបានដាក់រហស្សនាមឱ្យគេតាមបណ្តាញសង្គមថា «ស្តេចលីប៊ើរ៉ូ» ឬ «កំផែងរបស់ជប៉ុន»។

មូលហេតុដែល Yamamoto ទទួលបានរហស្សនាមបែបនេះ ដោយសារគេតែងតែដើរតួនាទីជាអ្នកជួយសង្គ្រោះក្រុមបាល់ទះ ជប៉ុន មិនថាកាលៈទេសៈបែបណា ឬការប្រកួតកម្រិតណានោះទេ។ ភាសា​សាមញ្ញ​ហៅ​ថា ជើង​ក្រោម​រឹង​មាំ​ណាស់​សម្រាប់បុរស​វ័យ​ ៣១ ឆ្នាំ កម្ពស់ ១.៧១ ម៉ែត្ររូបនេះ ដោយសាររូបគេ​​​មានសមត្ថភាពពិសេសខាងសង្គ្រោះបាល់តាមរយៈចលនាលឿនរហ័សដូចផ្លេកបន្ទោរ។

ងាកមកមើលប្រវត្តិត្រួសៗរបស់កីឡាករសញ្ជាតិ ជប៉ុន រូបនេះ បច្ចុប្បន្ន​កំពុងលេងនៅក្លិប Osaka Bluteon ក្នុងលីគ ជប៉ុន។ នៅក្នុងក្លិបអាជីព Yamamoto ឈ្នះពានចំនួន ៤ តាមក្លិបរបស់គេធ្លាប់លេងនីមួយៗដូចជា Japanese Emperor’s Cup All Japan Championship ១ លើក, ពាន Japan Volleyball Panasonic Energy Cup ១ លើក, ពាន East Japan Intercollegiate Championship ១លើក និងពានកម្រិតសកលវិទ្យាល័យ Kanto University Spring League ១ លើក។

រីឯនៅជម្រើសជាតិវិញ អ្នកលេងវ័យ ៣១ ឆ្នាំធ្លាប់ជួយឱ្យ ជប៉ុន ឈ្នះមេដាយមាស ១ លើក, ប្រាក់ ១ លើក និងសំរឹទ្ធ​១​លើក ក្នុង​ជើង​ឯក​អាស៊ី​ Asian Championships។ ព្រឹត្តិការណ៍បាល់ទះ​ពិភព​លោក​ FIVB World Cup ធ្លាប់ឈ្នះមេដាយប្រាក់ ១ លើក, ពាន FIVB Men’s Volleyball Nations League ធ្លាប់ឈ្នះមេដាយប្រាក់ ១ លើក និងសំរឹទ្ធ ១​លើក និងនៅពាន Asian Cup ធ្លាប់ឈ្នះមេដាយសំរឹទ្ធ១​លើក។

ដោយឡែកពានឯកត្តជន Yamamoto ធ្លាប់ឈ្នះសឹងតែរាប់ភ្លេច​ទៅ​ហើយ​។ ក្នុងនោះគេធ្លាប់បានឈ្នះពានអ្នកលេងតួនាទី​លីប៊ើរ៉ូល្អបំផុត និងអ្នកសង្គ្រោះបាល់ល្អបំផុត ក្នុងពាន AVC Champions League រដូវកាល​២០២៤​-​២០២៥​។ នៅព្រឹត្តិការណ៍ VNL គេបានឈ្នះពានអ្នកលេងតួនាទីលីប៊ើរ៉ូល្អបំផុតកាលពីឆ្នាំ ២០២៤ និងពានអ្នកសង្គ្រោះបាល់ល្អបំផុតកាលពីឆ្នាំ ២០២៣។

គួរឱ្យដឹងថា Yamamoto កំពុងមានភារកិច្ចជួយក្រុមជម្រើសជាតិ ជប៉ុន ក្នុងពាន FIVB Men’s Volleyball Nations League ឆ្នាំ ២០២៥ នេះផងដែរ ប៉ុន្តែកាលពីការប្រកួតជុំដំបូងក្នុងសប្តាហ៍ទី ១ កន្លងទៅ រូបគេពុំទាន់ត្រូវបានគ្រូបង្វឹកលោក Laurent Tillie បញ្ចូលឈ្មោះប្រកួតនៅឡើយទេ៕

អត្ថបទ៖ សេម កុសល