ថាក់ស៊ីន សង្ឃឹមថា នឹងមានការសម្រេចដ៏អំណោយផល លើករណីព្យួរតំណែងកូនស្រី

នៅក្នុងកិច្ចពិភាក្សាពិសេស «បំបែកឧបសគ្គនយោបាយរបស់ប្រទេសថៃ» របស់ Nation Group កាលពីថ្ងៃពុធទី៩ខែកក្កដាឆ្នាំ២០២៥ លោក ថាក់ស៊ីន ស៊ីណាវ៉ាត្រ បានបង្ហាញក្តីសង្ឃឹមថា នឹងមានការសម្រេចដ៏អំណោយផលមួយ ជុំវិញករណីកូនស្រីរបស់លោកគឺ ផែថងថាន ស៊ីណាវ៉ាត្រ ដែលកំពុងត្រូវព្យួរតំណែងនាយករដ្ឋមន្ត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក ថាក់ស៊ីន, ប្រព័ន្ធនយោបាយបច្ចុប្បន្នរបស់ប្រទេសថៃ គឺជាកត្តាជំរុញដ៏សំខាន់នាំឲ្យមានភាពចលាចល។ ច្បាប់ត្រូវបានសរសេរឡើងដើម្បីរារាំងរូបលោកបន្ទាប់ពីមានរដ្ឋប្រហារកាលពីពេលកន្លងមក។

លោកក៏កត់សម្គាល់ដែរថា ប្រព័ន្ធបច្ចុប្បន្នធ្វើឲ្យគណបក្សនីមួយៗ ពិបាកក្នុងការដឹកនាំតែឯងណាស់ បើគ្មានការបង្កើតរដ្ឋាភិបាលចម្រុះទេនោះ។

សូមជម្រាបជាថ្មី តុលាការធម្មនុញ្ញកាលពី​​រសៀល​​​ថ្ងៃអង្គារទី១ខែកក្កដា បានសម្រេច​​ព្យួរ​តួនាទី​របស់​​នាយករដ្ឋមន្ត្រី​ ផែថង​ថាន ក្រោយបែកធ្លាយការសន្ទនាតាមទូរស័ព្ទជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

ក្នុង​ការ​បោះឆ្នោតនោះ ចៅ​ក្រម​តុលាការ​ធម្មនុញ្ញ​​៧រូប​បានបោះ​ឆ្នោត​​ឲ្យ​ផ្អាក​តួនាទី​នាយករដ្ឋមន្ត្រី ខណៈ​​២​រូប​ទៀត​​បោះឆ្នោត​ប្រឆាំង​។

ការ​សម្រេច​របស់​​​​ក្រុមប្រឹក្សា​ចៅក្រម​តុលាការ​​​ធម្មនុញ្ញនាពេលនេះ ធ្វើ​ឡើង​តាម​បណ្តឹង​​ពីសមាជិកព្រឹទ្ធសភាចំនួន ៣៦រូប ដោយ​​​​ចោទប្រកាន់លោកស្រី ​ផែថងថាន ​ជុំវីញ​ការ​បំពាន​​រដ្ឋធម្មនុញ្ញ។

តុលាការបានផ្តល់ពេលឲ្យលោកស្រី ១៥ថ្ងៃដើម្បីដាក់ព័ស្តុតាងការពារខ្លួន។ ដូច្នេះ លោកស្រីនឹងត្រូវដាក់ព័ស្តុតាងឲ្យបានត្រឹមថ្ងៃទី១៦ខែកក្កដាឆ្នាំ២០២៥។

យ៉ាងណាមិនទាន់មានកាលបរិច្ឆេទជាក់លាក់ណាមួយដែលតុលាការនឹងប្រកាសសាលក្រមចុងក្រោយនោះទេ។ ករណីបែបនេះអាចចំណាយពេលច្រើនសប្តាហ៍ឬច្រើនខែ អាស្រ័យលើភាពស្មុគស្មាញនៃព័ស្តុតាងនិងដំណើរការតុលាការ។

ដូច្នេះក្រោយថ្ងៃទី១៦ខែកក្កដា តុលាការនឹងបន្តពិចារណាលើព័ស្តុតាង ហើយបន្ទាប់មកនឹងកំណត់កាលបរិច្ឆេទសម្រាប់ការប្រកាសសាលក្រមចុងក្រោយ៕

អត្ថបទ៖ សុខ សុវណ្ណ

ចុចអាន៖ ជម្លោះផ្ទៃក្នុងថៃ! Paetongtarn បន្ទោស Anutin ថា ប្រទេសគ្មានសុវត្ថិភាព ទើបទេសចរធ្លាក់ចុះ