ជម្លោះផ្ទៃក្នុងថៃ! Paetongtarn បន្ទោស Anutin ថា ប្រទេសគ្មានសុវត្ថិភាព ទើបទេសចរធ្លាក់ចុះ

នៅថ្ងៃពុធទី៩ខែកក្កដាឆ្នាំ២០២៥ នាយករដ្ឋមន្ត្រីព្យួរតំណែងថៃលោកស្រី Paetongtarn Shinawatra បានបន្ទោសចំៗទៅអតីតរដ្ឋមន្ត្រីក្រសួងមហាផ្ទៃលោក Anutin Charnvirakul ថា ដោយសារតែប្រទេសថៃគ្មានសុវត្ថិភាព ទើបទេសចរធ្លាក់ចុះ ពោលគឺមិនមែនដោយសារសេចក្តីព្រាងច្បាប់កាស៊ីណូទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការតបតទៅលោក Anutin, លោកស្រី Paetongtarn បានបញ្ជាក់យ៉ាងច្បាស់ថា ក្នុងនាមជាអតីតរដ្ឋមន្ត្រីក្រសួងមហាផ្ទៃ គឺមានទំនួលខុសត្រូវក្នុងការកែលម្អសុវត្ថិភាពសម្រាប់ភ្ញៀវទេសចរអន្តរជាតិ។ គាត់ប្រហែលភ្លេចហើយថា មូលហេតុចម្បងដែលនាំឲ្យភ្ញៀវទេសចរចិនឈប់មកលេងប្រទេសថៃ គឺដោយសារបញ្ហាសុវត្ថិភាពតែម្តង។ 

ទន្ទឹមនោះលោកស្រី Paetongtarn ទទួលស្គាល់ថា ទេសចរចិនញញើតនឹងមកលេងប្រទេសថៃណាស់ ព្រោះបញ្ហាក្រុមឆបោកតាមទូរស័ព្ទ (call-centre gang)។ លោក Anutin មិនបានធ្វើគ្រប់គ្រាន់ទេដើម្បីដោះស្រាយបញ្ហា។

មិនត្រឹមប៉ុណ្ណឹងលោកស្រី Paetongtarn បានច្រានចោលការអះអាងរបស់លោក Anutin ដែលថា ចំនួនភ្ញៀវទេសចរចិន ធ្លាក់ចុះ៩០% ដោយលោកស្រីបញ្ជាក់ថា ការធ្លាក់ចុះជាក់ស្តែងគឺប្រមាណ៣០%ប៉ុណ្ណោះ និងភាគច្រើនគឺដោយសារតែរដូវកាលទាប (Low Season)។

ជម្លោះនេះកើតឡើងស្របពេលសមាជិក​សភាថៃ​​ ភាគច្រើន​បានបោះឆ្នោត​​យល់​ព្រម​តាមសំណើ​របស់​​រដ្ឋាភិបាល​ដែល​ស្នើ​ដក​សេចក្តី​ព្រៀង​ច្បាប់​កាស៊ីណូ-​ការកម្សន្ត ដ៏​ចម្រូងចម្រាស​ដែល​​ណែនាំ​ដោយ​​គណបក្ស​ភឿថៃ​​​​ដឹកនាំ​ដោយ​លោកស្រី Paetongtarn។

​​ក្នុង​ចំណោម​សមាជិក​សភា​​ ៣១៨​រូប​ដែល​ចូលរួម​ប្រជុំ ​មាន២៥៣រូប​បោះឆ្នោត​គាំទ្រ​ឲ្យ​ដក​ចេញ​ ខណៈ ​​៦៥ រូប​​បោះឆ្នោត​ជំទាស់។

ការ​បោះឆ្នោតនេះទៀតសោត កើត​ឡើងតែ​១ថ្ងៃ​ប៉ុណ្ណោះ ក្រោយ​គណៈរដ្ឋមន្ត្រី​ថៃ ​​ដាក់​សំណើ​ដក​សេចក្តីស្នើ​ច្បាប់​នេះ​ចេះ​វិញ ដោយសារ​តែបម្រែបម្រួល​​លើ​ទិដ្ឋភាព​នយោបាយ​នៅ​​ប្រទេស​​ថៃ​៕

អត្ថបទ៖ សុខ សុវណ្ណ

ចុចអាន៖ សមាជិក​សភា​ថៃ​​​​ បោះ​ឆ្នោត​​ដក​​សេចក្តីស្នើ​ច្បាប់​​​​​​ «កាស៊ីណូ-កម្សាន្ត»​ ​តាម​សំណើ​គណៈរដ្ឋមន្ត្រី​