ទេសរដ្ឋមន្រ្តី គន់ គីម៖ រដ្ឋាភិបាលបន្តយកចិត្តទុកដាក់ខ្ពស់ចំពោះមន្រ្តីចូលនិវត្តន៍ មិនទុកឱ្យឯកោឡើយ

លោកទេសរដ្ឋមន្រ្តី គន់​ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានលើកឡើងថា រដ្ឋាភិបាលអាណត្តិមុនដែលដឹកនាំដោយសម្តេចតេជោ ហ៊ុន សែន និងរដ្ឋាភិបាលបន្តវេន ដឹកនាំដោយសម្តេចធិបតី ហ៊ុន ម៉ាណែត នៅតែបន្តយកចិត្តទុកដាក់ខ្ពស់ចំពោះមន្ត្រីរាជការចូលនិវត្តន៍ទាំងអស់ ពោលគឺទាំងមន្ត្រីកងកម្លាំងប្រដាប់អាវុធ និងមន្ត្រីរាជការស៊ីវិល ដោយមិនទុកឱ្យមន្ត្រីចូលនិវត្តន៍ណាម្នាក់នៅឯកោ និងរស់នៅដោយលំបាកឡើយ។

លោកបានលើកឡើងបែបនេះ នាឱកាសដឹកនាំកិច្ចប្រជុំអន្តរក្រសួង ដើម្បីពិភាក្សា និងស្តាប់ការផ្តល់យោបល់ ស្តីពីការកែសម្រួលលក្ខន្តិកៈនៃសមាគមអតីតយុទ្ធជនកម្ពុជា និងការត្រៀមរៀបចំមហាសន្និបាតវិសាមញ្ញតំណាងសមាគមអតីតយុទ្ធជននៅទូទាំងប្រទេស ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានសមាគម ដែលប្រព្រឹត្តទៅនាថ្ងៃទី២៦ ខែកក្កដា ឆ្នាំ២០២៥ ខាងមុខ។ មហាសន្និបាតនេះ ក៏ត្រៀមធ្វើវិសោធន​កម្មលក្ខន្តិកៈ ដើម្បីបញ្ជូលនិវត្តជន ឱ្យមកជ្រកក្រោមឆ័ត្រតែមួយរបស់សមាគមអតីតយុទ្ធជន តាមការផ្តល់អនុសាសន៍របស់សម្តេចតេជោ ហ៊ុន សែន។

នាកិច្ចប្រជុំនោះ លោក គន់ គីម បញ្ជាក់ថា៖«គោលបំណងរបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន យល់ឃើញថា ដោយសារអតីតយុទ្ធជន និងនិវត្តជន សុទ្ធសឹងតែជាអ្នករួមចំណែកម្ខាងជួយក្នុងការសុខសន្តិភាព ស្ថិរភាព និងម្ខាងជានិវត្តជន បានចូលរួមកសាង និងអភិវឌ្ឍជាតិ ដែលបានធ្វើឱ្យប្រទេសកម្ពុជាមានភាពរីកចម្រើនរហូតមកដល់ពេលបច្ចុប្បន្ន»។

សូមជម្រាបជូនថា មហាសន្និបាតវិសាមញ្ញតំណាងសមាគមអតីតយុទ្ធជនកម្ពុជានៅទូទាំងប្រទេស ដែលរៀចំធ្វើឡើងនាចុងខែកក្កដាឆាប់ៗខាងមុខនេះ ក្នុងគោលបំណង ៣សំខាន់ៗ រួមមាន ទី១ បូកសរុបលទ្ធផលការងាររយៈពេល ១០ឆ្នាំរបស់សមាគម, ទី២ កែសម្រួលនិមិត្តសញ្ញាសមាគម និងឈ្មោះសមាគម ដោយផ្លាស់ប្តូរពីសមាគមអតីតយុទ្ធជនកម្ពុជា ទៅជា សមាគមអតីតតយុទ្ធជន និងនិវត្តជនកម្ពុជា  និងទី៣ ការធ្វើវិសោធនកម្មលក្ខន្តិកៈ ដើម្បីបញ្ជូលនិវត្តជន ឱ្យមកជ្រកក្រោមឆ័ត្រតែមួយរបស់សមាគម៕