ព័ត៌មានជាតិ

ក្រសួងកសិកម្ម ចុះ MOU ជាមួយវិស័យឯកជន ពន្លឿនចីរភាពក្នុងប្រព័ន្ធកសិ-ស្បៀងអាហារកម្ពុជា

បានផុស

៥ ថ្ងៃ មុន

នៅ

ថ្ងៃចន្ទ ១៤ កក្កដា ២០២៥

ដោយ

ក្រសួងកសិកម្ម រុក្ខាប្រមាញ់ និងនេសាទ បាន ចុះអនុស្សរណៈនៃការយោគយល់គ្នា (MOU) ជាមួយអង្គការភីផល អិននីតកម្ពុជា ស្តីពី ការពន្លឿនចីរភាពនៅក្នុងប្រព័ន្ធកសិ-ស្បៀងអាហារ កម្ពុជា (ASCA)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីចុះហត្ថលេខានៅថ្ងៃទី១៤ ខែកក្កដានេះ លោក សរ ចិត្រា អគ្គលេខាធិការនៃក្រសួងកសិកម្ម ថា អនុស្សរណៈនៃការយោគយល់គ្នានេះ ត្រូវបានរៀបចំឡើង ក្នុងបំណងចូលរួមចំណែកក្នុងកិច្ចសហការដើម្បីលើកកម្ពស់ ការពន្លឿនចីរភាពនៅក្នុងប្រព័ន្ធកសិ-ស្បៀងអាហារកម្ពុជា (ASCA) ដែលផ្ដល់មូលនិធិដោយសហភាពអឺរ៉ុប តាមរយៈកម្មវិធី SWITCH-Asia នឹងចាប់ផ្តើមនៅក្នុងឆ្នាំ២០២៥ រហូតដល់ចុងឆ្នាំ២០២៧។

មិនតែប៉ុណ្ណោះ តាមរយៈគម្រោងនេះនឹងជួយពន្លឿនការផ្លាស់ប្តូរឆ្ពោះទៅរកប្រព័ន្ធកសិ-ស្បៀងអាហារមួយឱ្យមាននិរន្តរភាព តាមរយៈការបង្កើនការប្រើប្រាស់ជីកាបូន និងបច្ចេកវិទ្យាកសិកម្មបៃតង ដែលអាចកាត់បន្ថយការបំភាយឧស្ម័នផ្ទះកញ្ចក់ ការប្រើប្រាស់ធនធានកាន់តែមានប្រសិទ្ធភាពជាងមុន និងការជំរុញកំណើនសេដ្ឋកិច្ចនៅតំបន់ជនបទនៃប្រទេសកម្ពុជា។ នេះបើយោងតាមលោក ចិត្រា។

គម្រោងនេះ គឺដើម្បីចូលរួមចំណែកកាត់បន្ថយការបញ្ចេញកាបូនពីខ្សែច្រវាក់តម្លៃកសិកម្មនៅកម្ពុជាតាមរយៈការបង្កើនការប្រើប្រាស់ជីកាបូន ដែលជាបច្ចេកវិទ្យាកសិកម្មបៃតង ដោយសហគ្រាសកសិកម្មធុន មីក្រូ តូច និងមធ្យមនៅតាមជនបទ ព្រមទាំងបង្កើនគុណតម្លៃនៃការបាត់បង់ស្បៀងអាហារ ដើម្បីរួមចំណែកដល់ការធានាចីរភាពប្រព័ន្ធកសិ-ស្បៀងអាហារ ដែលប្រើប្រាស់គោលការណ៍សេដ្ឋកិច្ច រួមទាំងការប្រើប្រាស់ធនធានប្រកបដោយប្រសិទ្ធភាព ដែលនឹងនាំឱ្យមានការកាត់បន្ថយការបំភាយឧស្ម័នផ្ទះកញ្ចក់ និងជំរុញកំណើនសេដ្ឋកិច្ចនៅតាមតំបន់ជនបទនៃប្រទេសកម្ពុជា៕