រុស្ស៊ីអាចខាតបង់រាប់សិបពាន់លានដុល្លារ បើឱសានវាទថ្ងៃទី​៨ខែសីហារបស់ ត្រាំ ផុត​កំណត់

ប្រទេសរុស្ស៊ី អាចនឹងបាត់បង់​ចំណូលពីប្រេង​​ប្រមាណ ៥ ទៅ ៧​ពាន់​លាន​ដុល្លារ​ជា​រៀង​រាល់​ខែ ឬ​ជាង ៣០ពាន់លានដុល្លារ​គិត​ទៅ​ដល់​ចុងឆ្នាំ​២០២៥ បើខ្លួនបរាជ័យក្នុងការបំពេញ​តាមឱសានវាទថ្ងៃទី៨​ខែសីហា របស់ប្រធានាធិបតីអាមេរិក លោក ដូណាល់ ត្រាំ ដើម្បីបញ្ចប់សង្គ្រាមនៅអ៊ុយក្រែន។ នេះបើយោងតាមអ្នកវិភាគសេដ្ឋកិច្ច និងមន្ត្រីសហរដ្ឋអាមេរិក។

សេតវិមានបានព្រមានថា បើទីក្រុងមូស្គូមិនយល់ព្រមលើបទឈប់បាញ់តាមកាលកំណត់នោះ សហរដ្ឋអាមេរិកនឹងដាក់ពន្ធគយ និងទណ្ឌកម្មថ្មីដ៏ធំសម្បើម លើការនាំចេញប្រេងរបស់រុស្ស៊ី និងដាក់សម្ពាធលើប្រទេសផ្សេងទៀត​ឲ្យ​បញ្ឈប់ការទិញថាមពលពីរុស្ស៊ី។ លោក ត្រាំ ក៏​បាន​ប្តេជ្ញា​ដាក់​ទណ្ឌកម្ម​អ្នក​ទិញ​ប្រេង​បរទេស​ពី​រុស្ស៊ី​ជាមួយនឹង​​ការដំឡើង​ពន្ធ​រហូត​ដល់ ៥០០%។

មន្ត្រីរតនាគារអាមេរិកជាន់ខ្ពស់ម្នាក់ បាន​ប្រាប់ WSJ និង Bloomberg ថា «ប្រសិនបើរុស្ស៊ីខកខានកាលបរិច្ឆេទកំណត់ ខ្លួន​អាចបាត់បង់ប្រាក់ចំណូលពី ៥ ទៅ ៧​ពាន់លានដុល្លារក្នុងមួយខែៗ។ នោះ​គឺ​ជាង ៣០​ពាន់​លាន​ដុល្លារ​នៅ​ដំណាច់​ឆ្នាំ​នេះ​តែ​ឯង​»។

យោង​តាម​ការ​ចុះផ្សាយ​របស់ Business Insider បច្ចុប្បន្នរុស្ស៊ីរកបានប្រហែល ១​ពាន់លានដុល្លារក្នុងមួយថ្ងៃៗ ពីការនាំចេញថាមពលរបស់ខ្លួន ប៉ុន្តែតួលេខនេះគឺពឹងផ្អែកខ្លាំងលើតម្លៃប្រេងពិភពលោក និងការបន្តទិញពីចិន ឥណ្ឌា និងប្រទេសដទៃទៀត។ ការធ្លាក់ចុះនៃតម្រូវការភ្លាមៗ ឬ​ការ​គំរាម​ដាក់​ទណ្ឌកម្មរបស់សហរដ្ឋអាមេរិក អាចធ្វើ​ឲ្យអ្នកទិញខ្លាច​​រអា ដោយបង្ខំ​ឲ្យ​រុស្ស៊ីលក់ប្រេងដោយការបញ្ចុះតម្លៃយ៉ាងខ្លាំង ឬបិទផលិតកម្មទាំងស្រុង។

វិមានក្រឹមឡាំងបាននិង​កំពុងប្រើប្រាស់មូលនិធិទ្រព្យសម្បត្តិជាតិរបស់ខ្លួន ដើម្បីរ៉ាប់រងការចំណាយលើសង្គ្រាមដែលកំពុងកើនឡើង ប៉ុន្តែអ្នកជំនាញនិយាយថា មូលនិធិនេះកំពុងធ្លាក់ចុះយ៉ាងឆាប់រហ័ស។ គួបផ្សំនឹងការកើនឡើងអតិផរណា ការធ្លាក់ចុះនៃការវិនិយោគបរទេស និងការកើនឡើងនៃការចំណាយលើវិស័យការពារជាតិ សេដ្ឋកិច្ចរបស់រុស្ស៊ីកំពុងបង្ហាញសញ្ញាអវិជ្ជមាន។

ថ្មីៗនេះ មូលនិធិរូបិយវត្ថុអន្តរជាតិ (IMF) បានបន្ទាបការព្យាករកំណើនឆ្នាំ​២០២៥ របស់រុស្ស៊ីមកត្រឹម ០,៩% ដោយលើកឡើងពីទស្សនវិស័យពាណិជ្ជកម្មទន់ខ្សោយ និង​សង្គ្រាម​អូសបន្លាយក្នុងប្រទេសអ៊ុយក្រែន។

លោក ត្រាំ បានបញ្ជាក់យ៉ាងច្បាស់ថា បើប្រធានាធិបតីរុស្ស៊ី លោក វ្ល៉ាឌីមៀរ ពូទីន មិនគោរពតាមលក្ខខណ្ឌសន្តិភាពទេ ទីក្រុងវ៉ាស៊ីនតោននឹងចាត់វិធានការ ដែលអាចបំផ្លាញសមត្ថភាពរបស់រុស្ស៊ីក្នុងការផ្តល់មូលនិធិដល់សង្រ្គាម និងសេដ្ឋកិច្ចរបស់ខ្លួន។

សូម​ជម្រាប​ថា ប្រាក់ចំណូលពីប្រេង និងឧស្ម័នរបស់រុស្ស៊ី បាន​រួម​ចំណែក​ប្រហែល ២៥% នៃថវិកាជាតិ​សរុប៕

ដោយ៖ ឈាង