ជំនន់ទឹកភ្លៀង បង្កការជន់លិច​លំនៅដ្ឋានពលរដ្ឋតាម​តំបន់មួយចំនួនក្នុងភូមិសាស្ត្រខេត្តក្រចេះ

ជំនន់ទឹកភ្លៀង បង្កការជន់លិច​លំនៅដ្ឋានរបស់ប្រជាពលរដ្ឋនៅតំបន់មួយចំនួនក្នុងភូមិសាស្ត្រខេត្តក្រចេះ ដែលរស់នៅជាប់តាមដងទន្លេមេគង្គ និងវាលទំនាប និងដងព្រែកជាដើម ។

ជាក់ស្តែង នាថ្ងៃទី៥ ខែកញ្ញា ឆ្នាំ២០២៥ វេលាម៉ោង ០៨និង០០នាទី កម្លាំងនៃអធិការដ្ឋាននគរបាលស្រុកចិត្របុរី សហការជាមួយកម្លាំងប៉ុស្តិ៍នគរបាលរដ្ឋបាលដារ បានចុះជួយអន្តរាគមន៍ជម្លៀសប្រជាពលរដ្ឋ និងសត្វពាហនៈ នៃគ្រោះទឹកជំនន់ ស្ថិតនៅចំណុចភូមិម្រ៉ើម ឃុំដារ ស្រុកចិត្របុរី ខេត្តក្រចេះ មកទីទួលសុវត្តិភាព។

លោក វិរៈសេនីយ៍ឯក ប៊ុត នឿន អធិការនគរបាលស្រុកចិត្របុរី បានឱ្យដឹងថា កម្លាំង​នគរបាលនៃអធិការស្រុកចិត្របុរី បានចុះពិនិត្យស្ថានភាពទឹក នៅចំនុចភូមិម្រ៉ើម ឃើញថាទឹកបានលិចចូលផ្ទះប្រជាពលរដ្ឋសរុបប្រហែល ១០០ខ្នងផ្ទះ និងលិចផ្លូវលំប្រវែង ៦ ០០០ ម៉ែត្រ។

លោកឱ្យដឹងថា ប្រជាពលរដ្ឋចំនួន ១៧ គ្រួសារ សត្វគោ ២៣០ក្បាល និងសត្វក្របី ៨០ក្បាល ត្រូវបានកម្លាំងអធិការ​ដ្ឋាននគរបាលស្រុកចិត្របុរី ជម្លៀសទៅកាន់ទីទួលសុវត្ថិភាព ។

ជាមួយគ្នានោះ លោកបានណែនាំ​ឲ្យ​ពលរដ្ឋត្រូវមានការប្រុងប្រយ័ត្នខ្ពស់ចំពោះស្ថានភាពទឹកជំនន់ដែលនៅតែបន្តហក់ជន់ឡើងនិងបានផ្តល់លេខទូរសព្ទសម្រាប់ទំនាក់ទំនងបន្ទាន់មកកាន់នគរបាលស្រុកផងដែរ៕

អត្ថបទ ប្រុញ វិធិន