សួស វីសា ចេញសារសុំទោសនូវកំហុសអចេតនា ក្រោយផ្ទុះការវែកញែករឿងចូលហាង Pizza

មហាជនកំពុងផ្ទុះការវែកញែករឿងរ៉ាវរបស់តារាចម្រៀងស្រីល្បីឈ្មោះ សួស វីសា និងក្រុមគ្រួសារ ខណៈដែលកំពុងត្រៀមចេញដំណើរកម្សាន្តទៅក្រៅប្រទេស បានចូលហាង Pizza មួយ ដែលគេស្គាល់ទូទៅថា ស្ថិតក្រោមស្លាកយីហោក្រុមហ៊ុនផ្ទះលេខ២ ។

ជាមួយនឹងសកម្មភាពដឹកនាំក្រុមគ្រួសារដែលមានសមាជិកច្រើន ទាំងក្មេងនិងមនុស្សចាស់ ព្រមនិងវ៉ាលីច្រើនផង អ្នកនាង សួស វីសា សារភាពថាខ្លួនពិតជាខុស ប៉ុន្តែនោះជាកំហុសអចេតនាទេ។ អ្នកនាងថា ដោយសារតែពេលនោះ ជណ្តេីរយន្តដាច់ភ្លេីងអត់ដំណេីរការ វ៉ាលីក៏ច្រេីន សមាជិកក៏ច្រេីន ឯក្មេងៗក៏យំទាមាន់បំពងឡើងវ៉ល់ផង ក៏មេីលមិនគ្រប់ជ្រុងជ្រោយ។

អ្នកនាង សួស វីសា បញ្ជាក់ទៀតថា ខ្លួនពិតជាអត់ដឹងថាខុសសោះពេលនោះ ប៉ុន្តែយ៉ាងណា អ្នកនាងពិតជាសុំទោស និងត្រៀមចេញវីដេអូសុំទោសជាសាធារណៈបន្តិចទៀតនេះផងដែរ ដោយសុំឱ្យសាធារណជនយោគយល់អធ្យាស្រ័យ និងសន្យាថា មិនធ្វេសប្រហែសលើកទី២ឡើយ។

គួររំលឹកថា ចាប់តាំងពីមានជម្លោះព្រំដែនកម្ពុជា-ថៃ កាលពីខែកក្កដាមក មហាជនខ្មែរទាំងក្នុងស្រុក និងក្រៅស្រុក បានរួបរួមគ្នាពហិកាមិនប្រើប្រាស់ និងគាំទ្រផលិតផលថៃទៀតនោះឡើយ មិនថាហាងអាហារ ទំនិញវេចខ្ចប់ ឬសម្ភារៈប្រើប្រាស់ជាដើម។ល។ ខណៈកន្លងមក ពលរដ្ឋខ្មែរផ្តោតការពហិកាលើហាងអាហារ និងភេសជ្ជៈមានប្រជាប្រិយនៅកម្ពុជា ដូចជា Amazon និង Pizza Company ជាដើម៕