សួស វីសា ព្រមានប្តឹងនារីម្នាក់តាមវិធានការច្បាប់ ក្រោយបំពានទំនុកចិត្ត

អ្នកនាង សួស វីសា បានប្រកាស ព្រមានចាត់វិធានការតាមផ្លូវច្បាប់ចំពោះនារីម្នាក់ ដែលបានបំពានលើទំនុកចិត្តឆ្លៀតឱកាសលួចលុយ និងទូរស័ព្ទហើយគេចខ្លួនទៅបាត់។ ជាមួយគ្នានេះដែរ អ្នកនាង សួស វីសា បានប្រកាសទុកពេលឱ្យនារីម្នាក់ ២៤ម៉ោង ដោយកំណត់ឱ្យនារីរូបនោះត្រូវប្រគល់ទូរស័ព្ទដែលបានយកទៅ មកកាន់ក្រុមហ៊ុនវិញ បើពុំដូច្នោះទេ អ្នកនាងនឹងបង្ហាញមុខ ហើយដាក់ពាក្យបណ្តឹងតាមផ្លូវច្បាប់ថែមទៀត។

តារាចម្រៀងអ្នកនាង សួស វីសា និយាយទៀតថា “លួចលុយខ្ញុំហែងមានឈ្មោះជាចោរហេីយ អ៊ីចឹងគ្មានសិទ្ធិតវ៉ាទេ នេះខ្ញុំចង់បានតែលុយដែលហែងលួចនោះមកវិញទេ ប្រយ័ត្នតែខ្ញុំមិនចង់បានសូម្បីមួយរៀលមកវិញនោះ ពេលនោះហែងប្តូរពណ៌បាយសម្រាប់ហូបហេីយ”។

សួស វីសា បន្ថែមដែរថា កាលដែលខ្លួននៅទុកពេលឱ្យ និងទាមទារត្រឹមតែរបស់ និងលុយកាក់មកវិញនេះ ក៏ព្រោះតែនៅអាសូរ ប៉ុន្តែប្រសិនណានារីរូបនោះ នៅតែមិនធ្វើតាមការព្រមាននេះទេ អ្នកនាងលែងចង់បានរបស់និងលុយកាក់ទៀតហើយ គឺសុំតែម្យ៉ាង ឱ្យជននោះទទួលខុសត្រូវចំពោះមុខច្បាប់ទោះបីត្រូវចំណាយអស់ប៉ុន្មានមុឺនដុល្លារក៏ហ៊ានចំណាយដែរ៕ អត្ថបទ៖ ចាន់រ៉ា