មាឃបូជាឆ្នាំនេះ មានសម្ទុះពុទ្ធបរិស័ទចូលរួមច្រើនជាងឆ្នាំមុនៗគួរឱ្យកត់សម្គាល់

ក្រសួងធម្មការ និងសាសនា នៅព្រឹកថ្ងៃទី២៥ ខែកុម្ភៈ ឆ្នាំនេះ បានឱ្យដឹងថា ពិធីបុណ្យមាឃបូជា ក្នុងឆ្នាំ២០២៤ នេះ មានសន្ទុះពុទ្ធបរិស័ទចូលរួមច្រើនជាងឆ្នាំមុនៗគួរឱ្យកត់សម្គាល់ ចំណែកការរៀបចំតាមវត្តក៏បានល្អច្រើន គួរជាទីជ្រះថ្លាខ្លាំងណាស់។

ពិធីបុណ្យ មាឃបូជា ឆ្នាំនេះ ប្រព្រឹត្តទៅរយៈពេល២ ថ្ងៃ គឺថ្ងៃសៅរ៍ ១៥កើត និងថ្ងៃអាទិត្យ ១រោច ខែមាឃ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២៤ និងថ្ងៃទី២៥ ខែកុម្ភៈ ឆ្នាំ២០២៤។

លោក ចាយ បូរិន រដ្ឋមន្ត្រីក្រសួងធម្មការ និងសាសនា និងលោកស្រី សូ ភត្រា បានអញ្ជើញចូលរួមពិធីបុណ្យ មាឃបូជា នៅព្រះមហាសក្យមុនីចេតិយ ភ្នំព្រះរាជទ្រព្យ (ឧតុង្គ) ស្រុកពញ្ញាឮ ខេត្តកណ្តាល នាថ្ងៃម្សិលមិញ ដោយមានការនិមន្តចូលរួម ពីសំណាក់ព្រះសង្ឃ ថ្នាក់ដឹកនាំរាជរដ្ឋាភិបាល រដ្ឋសភា-ព្រឹទ្ធសភា មន្ត្រីរាជការ ពុទ្ធបរិស័ទ និងប្រជាពលរដ្ឋជាច្រើននាក់។

គួរបញ្ជាក់ថា មាឃបូជា គឺជាបុណ្យដ៏សំខាន់មួយនៅក្នុងព្រះពុទ្ធសាសនា ប្រារព្ធឡើងដើម្បីរំលឹកដល់ហេតុការណ៍ សំខាន់ៗពីរយ៉ាងគឺ៖

១. ជាថ្ងៃចតុរង្គសន្និបាត ជាការជួបប្រជុំប្រកបដោយអង្គ៤ គឺ៖ ព្រះសង្ឃសមណទូត ១ ២៥០ អង្គ និមន្តមកជួបជុំគ្នាដោយមិនបានណាត់គ្នាជាមុន, ព្រះសង្ឃទាំងអស់សុទ្ធតែជាឯហិភិក្ខុ (ឯហិភិក្ខុឧបសម្បទា), ព្រះសង្ឃទាំងអស់សុទ្ធតែជាព្រះអរហន្តបានអភិញ្ញា ៦ និង ថ្ងៃដែលព្រះសង្ឃទាំងអស់ជួបប្រជុំគ្នានោះ ជាថ្ងៃពេញបូណ៌មីខែមាឃ។
២. ជាថ្ងៃដែលព្រះសម្មាសម្ពុទ្ធទ្រង់ប្រកាសដាក់ព្រះជន្មាយុសង្ខារ៕