ខេត្តព្រះសីហនុ ​ទទួល​បាន​គម្រោង​វិនិយោគថ្មី២ គឺ​​រោង​ចក្រ​ផលិត​ប្រេង ​និងរោងចក្រ​គ្រឿង​តុបតែង ​​មាន​ទំហំទុនសរុប ១៥ ​លាន​ដុល្លារ

ខេត្តព្រះសីហនុ​ទទួលបានសំណើសុំវិនិយោគថ្មីចំនួន ២ គឺគម្រោងសាងសង់​រោងចក្រផលិត​ប្រេងសម្រាប់ផលិតកៅស៊ូ និងក្រុមហ៊ុនផលិតគ្រឿងតុបតែងលម្អ សម្រាប់បុណ្យណូអែល ដែលមានទំហំទុនវិនិយោគសរុបជាង ១៥ លានដុល្លារ នឹងអាចបង្កើតការងារជាង ១ ពាន់កន្លែង។

​ក្នុងនោះ គម្រោងរោងចក្រផលិតប្រេងផលិតកៅស៊ូ មានទុនវិនិយោគប្រមាណ ៧ លានដុល្លារ។ ចំណែកឯ​គម្រោង​ក្រុមហ៊ុនផលិតគ្រឿងតុបតែងលម្អ សម្រាប់បុណ្យណូអែល មានទំហំទុន ៨ លានដុល្លារ។​

​លោក ឡុង ឌីម៉ង់ អភិបាលរង នៃគណៈអភិបាលខេត្តព្រះសីហនុនៅព្រឹកថ្ងៃទី ​២១ ខែវិច្ឆិកា ឆ្នាំ ២០២៥​ បាន​លរួមកិច្ចប្រជុំ​ច្រកចេញ-ចូលតែមួយ​ ដើម្បីពិនិត្យពិភាក្សាលើសំណើសុំវិនិយោគ​របស់បណ្តាក្រុមហ៊ុនមួយចំនួន។

កិច្ចប្រជុំនេះរៀបចំឡើងក្នុងគោលបំណងដើម្បី បើកកិច្ចពិភាក្សា វាយតម្លៃ ភាពសមស្រប លក្ខណៈ​សម្បត្តិ វេទយិតភាព និងពិនិត្យលទ្ធភាពនៃគម្រោងវិនិយោគដែលបានដាក់ស្នើមក ក្រុមប្រឹក្សាអភិវឌ្ឍន៍កម្ពុជា។

​សំណើសុំគោលការណ៍វិនិយោគធ្វើរោងចក្ររបស់ក្រុមហ៊ុន ផលិតប្រេងផលិត​កៅស៊ូ និងក្រុមហ៊ុនផលិតគ្រឿងតុបតែងលម្អ សម្រាប់បុណ្យណូអែល ទទួលបាន​ការ​ឯក​ភាពជាគោលការណ៍ពីអង្គប្រជុំ៕