សង្រ្គាមអាមេរិក-អ៊ីរ៉ង់បង្កការខាតបង់ ២៥ ប៊ីលានដុល្លារ ដល់ក្រុមហ៊ុនជុំវិញពិភពលោក ​

ការវិភាគរបស់ទីភ្នាក់ងារសារព័ត៌មានរ៉យទ័រ បាន​បង្ហាញថា សង្គ្រាមប្រឆាំងអ៊ីរ៉ង់របស់សហរដ្ឋអាមេរិក និងអ៊ីស្រាអែល ​បានធ្វើឱ្យក្រុមហ៊ុននានានៅជុំវិញពិភពលោកខាតបង់យ៉ាងហោចណាស់ ២៥ ​ប៊ីលានដុល្លាររួចទៅហើយ ហើយ​តួលេខនេះ​កំពុងបន្តកើនឡើង​។

រាប់តាំងពីជម្លោះផ្ទុះឡើងនៅចុងខែកុម្ភៈ ក្រុមហ៊ុនជាច្រើននៅសហរដ្ឋអាមេរិក​ អឺរ៉ុប និងអាស៊ី បាន​រងផលប៉ះពាល់ដោយសារតែកំណើនថ្លៃថាមពល ការរំខានលើខ្សែច្រវ៉ាក់ផ្គត់ផ្គង់ និងបញ្ហាពាណិជ្ជកម្ម ដែលបណ្ដាលមកពីការបិទខ្ទប់ច្រកហ័រមូហ្សរបស់អ៊ីរ៉ង់។ ​

ក្រុមហ៊ុនយ៉ាងហោចណាស់​ ២៧៩ បាន​និយាយថា សង្គ្រាមបានបង្ខំពួកគេឱ្យចាត់វិធានការការពារដើម្បីកាត់បន្ថយការខូចខាតផ្នែកហិរញ្ញវត្ថុ។ ជំហានទាំងនេះរួមមានការដំឡើងថ្លៃផលិតផល​ ការកាត់បន្ថយផលិតកម្ម ការបញ្ឈប់ភាគលាភ ឬការទិញភាគហ៊ុនមកវិញ ការផ្អាកការងាររបស់កម្មករ ការបន្ថែមថ្លៃប្រេងឥន្ធនៈ និងការស្នើសុំជំនួយបន្ទាន់ពីរដ្ឋាភិបាល។​

ជម្លោះអាមេរិក-អ៊ីរ៉ង់​ ដែលជាបញ្ហាបន្តបន្ទាប់ពីកូវីដ១៩ និងសង្រ្គាមឈ្លានពានអ៊ុយក្រែនរបស់រុស្ស៊ី កំពុងកាត់បន្ថយការរំពឹងទុកពី​ដំណើរការល្អនៃអាជីវកម្ម​ពេញមួយឆ្នាំ ២០២៦ ដោយគ្មានសញ្ញាច្បាស់ណាមួយថាវានឹងបញ្ចប់ភ្លាមៗនោះទេ។

លោក Marc Bitzer នាយកប្រតិបត្តិក្រុមហ៊ុន Whirlpool បានប្រាប់អ្នកវិភាគបន្ទាប់ពីក្រុមហ៊ុនបានកាត់បន្ថយការព្យាករ​ប្រាក់ចំណូល​ពេញមួយឆ្នាំ​របស់ខ្លួនរហូតដល់ពាក់កណ្ដាល ថា៖ ​«កម្រិតនៃការធ្លាក់ចុះនៃឧស្សាហកម្ម​ គឺស្រដៀងគ្នាទៅនឹងអ្វីដែលយើង​ឃើញ​អំឡុង​វិបត្តិហិរញ្ញវត្ថុពិភពលោកដែរ​ ហើយថែមទាំងធ្ងន់ធ្ងរជាងអំឡុងពេលមានវិបត្តិសេដ្ឋកិច្ចផ្សេងៗទៅទៀត»។ ​

ក្រុមអ្នកវិភាគបាន​និយាយថា កំណើន​សេដ្ឋកិច្ចយឺតយ៉ាវ នឹងធ្វើឱ្យសមត្ថភាពដំឡើងថ្លៃរបស់ក្រុមហ៊ុន​ចុះខ្សោយ និងធ្វើឱ្យការចំណាយថេរពិបាកគ្រប់គ្រង ដែលដាក់សម្ពាធលើប្រាក់ចំណេញរបស់ពួកគេនៅត្រីមាសទី២ ​និងត្រីមាសបន្តបន្ទាប់​។ ​កំណើនថ្លៃទំនិញ​ក៏អាចជំរុញឱ្យអតិផរណាកាន់តែខ្ពស់ និងធ្វើឱ្យខូចខាតបន្ថែមទៀតដល់ទំនុកចិត្តរបស់អ្នកប្រើប្រាស់ដែលខ្សោយរួចទៅហើយ។​

គួរគូសបញ្ជាក់ថា ការបិទច្រកហ័រមូហ្ស ដែលជាផ្លូវដឹកជញ្ជូនប្រេង ១/៥ នៃតម្រូវការពិភពលោក បាន​ធ្វើឱ្យតម្លៃប្រេងហក់ឡើងដល់ជាង ១០០ ដុល្លារ/បារ៉ែល ពោលគឺខ្ពស់ជាងតម្លៃមុនសង្រ្គាមដល់ទៅ ៥០%។ ការបិទដដែល បាន​​ជំរុញឱ្យថ្លៃដឹកជញ្ជូនកើនឡើង កាត់បន្ថយការផ្គត់ផ្គង់វត្ថុធាតុដើម និងកាត់ផ្តាច់ផ្លូវពាណិជ្ជកម្មដ៏សំខាន់សម្រាប់លំហូរទំនិញ។ ការផ្គត់ផ្គង់ជី អេល្យូម អាលុយមីញ៉ូម ប៉ូលីអេទីឡែន និងធាតុចូលសំខាន់ៗផ្សេងទៀត ត្រូវបានរងផលប៉ះពាល់៕

​