១០ខែឆ្នាំ ២០២១ កម្ពុជារកចំណូលបាន​ពីការនាំ​ចេញស្រូវអង្ករចំនួនជិត​១០លានដុល្លារ

រយៈពេល ១០ខែ នៃឆ្នាំ២០២១ កម្ពុជា ទទួលបានប្រាក់ចំណូលពីការនាំចេញស្រូវអង្ករចំនួន ៩៥៧.៣០ លានដុល្លារសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សព្វផ្សាយរបស់សហព័ន្ធស្រូវអង្ករកម្ពុជា បានឲ្យដឹងថា ក្នុងរយៈពេល ១០ខែ នេះ ប្រទេសកម្ពុជា បាននាំចេញអង្ករគ្រប់ប្រភេទបានចំនួន ៤៦០,១៦៩តោន ដែលគិតជាទឹកប្រាក់មានចំនួន ៣២៣.៤៧ លានដុល្លារសហរដ្ឋអាមេរិក ទៅគោលដៅទីផ្សារចំនួន ៥៥ប្រទេស និងតំបន់ស្វយ័ត ដែលក្នុងនោះ ទីផ្សារចម្បងមានចំនួន ៥ គ្របដណ្តប់ ៧៩.០៣% លើបរិមាណអង្ករនាំចេញសរុប រួមមាន៖

១. ប្រទេសចិន និងតំបន់ស្វយ័តហុងកុង ម៉ាកាវ បាននាំចេញចំនួន ៤៩.៨០% ស្មើនឹង ២២៩,១៧៧ តោន

២. ប្រទេសបារាំង ១១.០៧% ស្មើនឹង ៥០,៩៥១ តោន

៣. ប្រទេសហ្កាប៊ុង ៧.៩៥% ស្មើនឹង ៣៦,៥៨៨ តោន

៤. ប្រទេសម៉ាឡេស៊ី ៦.៦៦% ស្មើនឹង ៣០,៦៥៦ តោន

៥. ប្រទេសហូឡង់ ៣.៥៥% ស្មើនឹង ១៦,៣៣៨ តោន។

ប្រភេទអង្ករនាំចេញនេះ មានដូចជា អង្ករក្រអូបគ្រប់ប្រភេទបានចំនួន ៣២៤,៣៦៤តោន ឬ ៧៨.៩៨% នៃការនាំចេញសរុប ដែលក្នុងនោះ (អង្ករក្រអូបប្រណិតមាន ៤១% អង្ករក្រអូបធម្មតាមាន ៣៧.៨៩%) អង្ករសគ្រាប់វែងមាន ២៩.៦៧ % អង្ករចំហុយមាន ១.៩៦ % និងអង្ករសរីរាង្គមាន ១.៤៤% ។

ចំពោះការនាំស្រូវចេញគឺមានបរិមាណសរុបចំនួន ២,៦៥៩,៦៦០ តោន ដែលគិតជាទឹកប្រាក់ប៉ាន់ស្មានប្រមាណជា ៦៣៣.៨២ លានដុល្លារសហរដ្ឋអាមេរិក។

ទឹកប្រាក់សរុបទាំងការនាំចេញស្រូវ និងអង្ករក្នុងរយៈពេល ១០ខែ នៃឆ្នាំ២០២១ មានប្រមាណជា ៩៥៧.៣០លាន ដុល្លារសហរដ្ឋអាមេរិក។

សម្រាប់ខែតុលា ឆ្នាំ២០២១ កម្ពុជានាំចេញអង្ករបានចំនួន ៤៩,៤៧១ តោន មានកំណើនប្រមាណជា ៤.០៨% បើធៀបទៅនឹងរយៈពេលដូចគ្នា ក្នុងខែតុលា ឆ្នាំ២០២០៕

អត្ថបទ៖ ទួន សុផល