អ្នកជំនាញសេដ្ឋកិច្ច៖ បច្ចុប្បន្នជាឱកាសល្អវិនិយោគ​លើដីធ្លីទទួលផលចំណេញ

លោក ង៉ែត ជូ អ្នកវិភាគសេដ្ឋកិច្ច និងជាអ្នកជំនាញហិរញ្ញវត្ថុបានលើកឡើងថា ពេលនេះជាឱកាសល្អក្នុងការវិនិយោគដីធ្លីសំរាប់បង្កើតជាចំណូល និងបំរើដល់ការរីកលូតលាស់នៃសេដ្ឋកិច្ចក្នុងរយៈពេល១០ឆ្នាំខាងមុខ។

លោក ង៉ែត ជូ បានសរសេរតាមបណ្ដាញសង្គមហ្វេសប៊ុកនៅថ្ងៃទី ២៥ ខែធ្នូនេះ បញ្ជាក់ថា តាមការប្រមើមើលរបស់អ្នកជំនាញឃើញថា លើសពី១០ឆ្នាំទៅមុខទៀតការវិនិយោគលើដីធ្លីដោយគ្រាន់តែទិញទុកលក់យកចំណេញនឹងមិនសូវមានផលចំណេញខ្ពស់ទៀតទេ។ ដោយហេតុថា ដូចប្រទេសអ្នកមានដទៃទៀតដែរ ទីផ្សារកាន់តែមានភាពចាស់ទុំ តម្លៃដីធ្លីនឹងកាន់តែថ្លៃខ្លាំង និងសេដ្ឋកិច្ចកាន់តែមានភាពរីកចំរើនដែលមានទំនោរទៅរកការប្រើប្រាស់ដីធ្លីដើម្បីបំរើដល់សកម្មភាពសេដ្ឋកិច្ចពិតប្រាកដ។

អ្នកវិភាគសេដ្ឋកិច្ចរូបនេះ អះអាងថា ពេលនេះជាឱកាសវិនិយោគទាន់ស្ថានភាពសេដ្ឋកិច្ចមិនសូវល្អ តម្លៃដីធ្លីនៅមានថ្លៃទាប និងអាចប្រែក្លាយដីធ្លីទាំងនោះដើម្បីបង្កើតជាចណូលអកម្មតាមរយៈការជួល ឬអភិវឌ្ឍជាគម្រោងនានានាពេលអនាគត៕