អាមេរិក ត្រៀមទិញប្រេង ៣ លានបារ៉ែលដើម្បីបំពេញស្តុកឡើងវិញ

ក្រសួងថាមពលរបស់សហរដ្ឋអាមេរិកនឹងទិញប្រេងឆៅចំនួន ៣ លានបារ៉ែលដើម្បីបំពេញទុនបម្រុងប្រេងយុទ្ធសាស្ត្រឡើងវិញទុកសម្រាប់ការចែកចាយនៅក្នុងខែសីហា ។  

រដ្ឋលេខាធិការក្រសួងថាមពលអាមេរិកលោកស្រី Jennifer Granholm បានប្រាប់ទៅសភាថា គោលការណ៍ទិញប្រេងនេះអាចនឹងចាប់ផ្តើមក្នុងពេលឆាប់ៗនេះ​ ដើម្បីយកទៅបំពេញ​ឃ្លាំងប្រេង Big Hill SPR ក្នុងរដ្ឋ Texas បន្ទាប់ពីការលក់ចេញក្នុងបរិមាណដ៏ច្រើនកាលពីឆ្នាំមុន ។

សម្រាប់ឆ្នាំ ២០២២​ រដ្ឋបាលលោក ចូ បៃដិន បានធ្វើការលក់ប្រេងបម្រុងដ៏ច្រើនបំផុតមិនធ្លាប់មានចំនួន ១៨០ លានបារ៉ែល ដែលជាផ្នែកមួយនៃយុទ្ធសាស្រ្តដើម្បីរក្សាស្ថិរភាពទីផ្សារប្រេងដែលកំពុងកើនឡើង ក៏ដូចជាប្រយុទ្ធប្រឆាំងនឹងតម្លៃប្រេងសកលឡើងខ្ពស់ ។

ខណៈពេលនោះ ធ្វើឲ្យអាមេរិកសល់ប្រេងបម្រុងត្រឹមតែ​ ៣៧២ លានបារ៉ែលប៉ុណ្ណោះ ដែលជាកម្រិតទាបបំផុត ចាប់តាំងពីឆ្នាំ ១៩៨៣ មក ដែលបានធ្វើឲ្យគណបក្ស​សាធារណរដ្ឋខឹងសម្បារយ៉ាងខ្លាំង ។

ប៉ុន្តែរដ្ឋាភិបាលលោក ចូ បៃដិន សន្យាថា នឹងទិញប្រេងចូល​វិញនៅពេលដែលតម្លៃថេរ ឬក្រោម ៦៧ ដុល្លារ ទៅ ៧២ ដុល្លារ ក្នុងមួយបារ៉ែល ស្របពេលបច្ចុប្បន្ន តម្លៃ​ប្រេងឆៅ​​អាមេរិក​មានតម្លៃ​ប្រហែល ៧១ ដុល្លារ​ក្នុង​មួយ​បារ៉ែល​កាលពី​ថ្ងៃ​ចន្ទ ៕

ប្រែសម្រួល៖​ នាង​ រតនៈ

ប្រភព ៖​ US News