ធនាគារ ថៃ ព្រមានហានិភ័យសេដ្ឋកិច្ចក្រោមគោលនយោបាយរបស់​រដ្ឋាភិបាលទើបជាប់ឆ្នោតថ្មី

សហគមន៍ធនាគារប្រទេសថៃមានការព្រួយបារម្ភថា គោលនយោបាយប្រជានិយមរបស់រដ្ឋាភិបាលចម្រុះថ្មីដែលដឹកនាំដោយគណបក្សចលនាឆ្ពោះទៅមុខ អាចនាំឲ្យមានឱនភាពថវិកាកាន់តែខ្ពស់ ។

មជ្ឈមណ្ឌលស្រាវជ្រាវរបស់ធនាគារ Kasikornbank និយាយថា គោលនយោបាយសេដ្ឋកិច្ចប្រជានិយម ដែលដាក់ចេញឡើងដោយគណបក្សចលនាឆ្ពោះទៅមុខដើម្បីឈ្នះការបោះឆ្នោតនោះ នឹងត្រូវការប្រាក់យ៉ាងច្រើនដើម្បីអនុវត្ត ។

ក្រុមស្រាវជ្រាវលើកឡើងទៀតថា ទោះបីជាគោលនយោបាយទាំងនេះនឹងមានផលប៉ះពាល់ជាវិជ្ជមានក្នុងរយៈពេលខ្លីទៅលើផលិតផលក្នុងស្រុកសរុប (GDP) ក៏ដោយ ប៉ុន្តែវាក៏អាចនាំឲ្យមានបន្ទុកហិរញ្ញវត្ថុកាន់តែខ្លាំងក្នុងរយៈពេលវែងផងដែរ ។

ចំណែកមូលហេតុនោះវិញ គឺដោយសារតែការផ្តល់មូលនិធិដល់គោលនយោបាយទាំងនេះ នឹងតម្រូវឲ្យមានការចាត់ចែងថវិកាឡើងវិញ ដែលប្រហែលជាមិនគ្រប់គ្រាន់ដើម្បីបង្កើនប្រាក់ចំណូលរបស់រដ្ឋាភិបាលតាមរយៈការបង់ពន្ធឡើយ ហើយការដំឡើងពន្ធ​នៅពេលនេះ គឺ​ឆោតបំផុត ដោយសារសេដ្ឋកិច្ចទើបតែងើបពីកូវីដវិញ ។

មជ្ឈមណ្ឌលស្រាវជ្រាវបន្ថែមថា រដ្ឋាភិបាលថ្មីទំនងមិនអាចបញ្ចៀសឱនភាពថវិកាបានឡើយ ហើយវានឹងជំរុញ​ឲ្យមានការកើនឡើងនៃគោលនយោបាយអត្រាការប្រាក់ ។ ប្រសិនបើឱនភាពថវិកាកើនឡើង នោះវាអាចប៉ះពាល់ដល់វិស័យឯកជន នៅពេលដែលសេដ្ឋកិច្ចកំពុងព្យាយាមងើបឡើងវិញ ។

មិនតែប៉ុណ្ណោះ វាក៏ប៉ះពាល់ដល់ការបែងចែកភូមិសាស្ត្រនយោបាយដែលកំពុងកើនឡើង ការផ្លាស់ប្តូររចនាសម្ព័ន្ធ ប្រជាសាស្រ្ត និងការថយចុះចំនួនប្រជាជនផងដែរ ។ ដោយឡែក មជ្ឈមណ្ឌល​ស៊ើប​អង្កេត​សេដ្ឋកិច្ចរបស់​ធនាគារ Siam Commercial Bank (SCB) បង្ហាញ​ថា លទ្ធផល​នៃ​ការ​បោះ​ឆ្នោត​ថ្ងៃ​ទី១៤ ខែ​ឧសភា គឺជា​គន្លឹះ​នៃ​ទិសដៅ​សេដ្ឋកិច្ច​របស់​​ថៃ ។

ទោះជាយ៉ាងណាក៏ដោយ ការបោះឆ្នោត និងការផ្លាស់ប្ដូររដ្ឋាភិបាល នឹងមិនមានផលប៉ះពាល់ខ្លាំងឡើយរហូតដល់ចុងត្រី ​មាសទី៣ ដោយសារតែថវិកាឆ្នាំ ២០២៣ អាចផ្កត់ផ្គង់លើការចំណាយរបស់រដ្ឋាភិបាលរហូតដល់ត្រីមាសមួយនេះ ហើយក្នុងអំឡុងពេលនេះដែរ ភ្នាក់ងាររដ្ឋាភិបាលអាចដំណើរការជាធម្មតាជាមួយនឹងគោលនយោបាយ និងគម្រោងដែលមានស្រាប់ ។ ប៉ុន្តែ​ទោះជាយ៉ាងណា ចូលដល់ត្រីមាសទី៤ ផលប៉ះពាល់ក៏នឹងឃើញកាន់តែច្បាស់ផងដែរ ។

ទន្ទឹមនោះ មជ្ឈមណ្ឌលស៊ើបអង្កេតសេដ្ឋកិច្ចរបស់ធនាគារ Siam Commercial Bank ក៏បានព្រមានផងដែរថា ការជំរុញសេដ្ឋកិច្ចនឹងថយចុះ ដោយសារតែភាពមិនច្បាស់លាស់នៅក្នុងការកំណត់ពេលវេលាអនុម័តនៃថវិកាសារពើពន្ធឆ្នាំ ២០២៤​ ខណៈពេលដែលគោលនយោបាយបន្ទាន់របស់រដ្ឋាភិបាលថ្មី នឹងចាប់ផ្តើមប៉ះពាល់ដល់សេដ្ឋកិច្ចនៅដើមឆ្នាំក្រោយ ៕

ប្រែសម្រួល៖ នាង រតនៈ

ប្រភព៖​ The Nation Thailand

ចុចអាន ៖ លោក ប្រាយុទ្ធ ៖ ខ្ញុំនៅតែជានាយករដ្ឋមន្ត្រី ថៃ