រដ្ឋាភិបាលជាប់ឆ្នោតថ្មីរបស់ ថៃ អាចនឹងពិបាកធ្វើតាមសន្យាចំពោះការកាត់​បន្ថយថ្លៃអគ្គិសនីជូនប្រជាពលរដ្ឋ

នាយកប្រតិបត្តិជាន់ខ្ពស់ថៃ ២ រូបមកពីវិស័យថាមពលបាននិយាយកាលពីពេលថ្មីៗនេះថា រដ្ឋាភិបាលដឹកនាំដោយគណបក្សចលនាឆ្ពោះទៅមុខ អាចពិបាកក្នុងការគោរពតាមគោលនយោបាយសន្យារបស់ខ្លួនក្នុងការកាត់បន្ថយថ្លៃអគ្គិសនីប្រើប្រាស់របស់ប្រជាជន ។

គណបក្សចលនាឆ្ពោះទៅមុខ បានសន្យាកាត់បន្ថយថ្លៃចំណាយអគ្គិសនីយ៉ាងតិច ១៥០ បាត (៤.៣៧ ដុល្លារ) ក្នុងមួយគ្រួសារ តាមរយៈការដំឡើង​ដំបូលសូឡា,​ កាត់បន្ថយ​ការបង់ប្រាក់ ដោយសារតែរោងចក្រថាមពលមិនដំណើរការ និងកែប្រែកិច្ចសន្យាមួយចំនួនជាមួយក្រុមហ៊ុនផលិតថាមពលធំៗជាដើម ។

លោក Sakarin Tangkavachirano ប្រធានផ្នែកអភិវឌ្ឍន៍អាជីវកម្មថាមពលនៃក្រុមហ៊ុន Ratch Group និយាយថា គណបក្សឆ្ពោះទៅមុខ គួរតែពិនិត្យមើលព័ត៌មានលម្អិតនៅក្នុងកិច្ចសន្យានីមួយៗ អំពីអ្វីដែលអាចធ្វើបាន ហើយការ​ពន្យា​ពេល​​វិនិយោគ​ក្នុង​កិច្ច​សន្យា​បន្ត​ ក៏អាច​បង្ក​ហានិភ័យ​ដល់​សន្តិសុខ​ថាមពល​របស់​​ថៃផងដែរ ។

លោក​បាន​បន្ត​ថា គោលនយោបាយរបស់គណបក្សចលនាឆ្ពោះទៅមុខក្នុងការលើកកម្ពស់ការប្រើប្រាស់ថាមពលពន្លឺព្រះអាទិត្យ នឹងមានការលំបាក ព្រោះវាពឹងផ្អែកលើពន្លឺព្រះអាទិត្យទាំងស្រុងតែម្តង ហើយវាអាចនឹងមិនគ្រប់គ្រាន់នោះទេ ។

ទន្ទឹមនឹងនេះ លោក Somphote Ahunai នាយកប្រតិបត្តិក្រុមហ៊ុន Energy Absolute យល់ឃើញថា រដ្ឋាភិបាលដែលជាប់ឆ្នោតថ្មីគួរតែដោះស្រាយកិច្ចសន្យាសាងសង់រោងចក្រថាមពលជាបន្ទាន់ ជាពិសេសរដ្ឋាភិបាលថ្មីគួរតែចៀសវាងការលុបចោលកិច្ចសន្យាដែលមានស្រាប់ ហើយអនុញ្ញាតឲ្យក្រុមហ៊ុនផលិតថាមពលថ្មីចូលក្នុងទីផ្សារ ក៏ដូចជា ធានាកិច្ចសន្យាដោយមិនដាក់បន្ទុកដល់ប្រជាពលរដ្ឋ និងគួររៀបចំគោលនយោបាយជំរុញការប្រើប្រាស់ថាមពលស្អាតក្នុងតម្លៃទាប ៕

ប្រែសម្រួល ៖ នាង រតនៈ

ប្រភព ៖ Nation Thailand

ចុចអាន ៖ លោក ប្រាយុទ្ធ ៖ ខ្ញុំនៅតែជានាយករដ្ឋមន្ត្រី ថៃ