អ្នកជំនាញព្រមាន គោលនយោបាយពន្ធរបស់ បក្សចលនាឆ្ពោះទៅមុខ អាចធ្វើឲ្យប៉ះពាល់ហិរញ្ញវត្ថុ ថៃ

លោក Pichai Naripthaphan អតីតរដ្ឋមន្ត្រីក្រសួងថាមពលថៃបាននិយាយកាលពីពេលថ្មីៗនេះថា គោលនយោបាយពន្ធរបស់គណបក្សចលនាឆ្ពោះទៅមុខដែលទើបជាប់ឆ្នោតថ្មី អាចប៉ះពាល់ដល់ស្ថានភាពហិរញ្ញវត្ថុរបស់ប្រទេសថៃ ។

លោកបានធ្វើការកត់សម្គាល់បែបនេះ បន្ទាប់ពីលោកស្រី Sirikanya Tansakun អនុប្រធានបក្សចលនាឆ្ពោះទៅមុខ និងជាប្រធានក្រុមសេដ្ឋកិច្ច បានបង្ហាញអំពីគោលនយោបាយបក្សស្តីពីពន្ធលើទ្រព្យសម្បត្តិ ពន្ធលើមូលធន និងការដំឡើងពន្ធសាជីវកម្ម ។

លោក Pichai ដែលបច្ចុប្បន្នជាអនុប្រធានគណៈកម្មាធិការយុទ្ធសាស្ត្រ និងនយោបាយរបស់គណបក្សភឿថៃ យល់ឃើញថា វាជាគំនិតល្អក្នុងការប្រមូលពន្ធបន្ថែម ដោយសារការយកពន្ធរបស់ប្រទេសថៃមានកម្រិតទាប បើធៀបនឹងផលិតផលក្នុងស្រុកសរុប (GDP) ។ ប៉ុន្តែទោះយ៉ាងណា ដោយសារលក្ខខណ្ឌបច្ចុប្បន្ននៅក្នុងប្រទេស គណបក្សចលនាឆ្ពោះទៅមុខ ត្រូវតែពិនិត្យមើលពេលវេលាសមស្របសម្រាប់ការបង្កើនពន្ធ ។

ចំណែកស្តីពីពន្ធ​ចំណេញមូលធនវិញ លោកបានព្រមានថា គោលនយោបាយបែបនេះកំពុងបង្កភាពមិនច្បាស់លាស់ក្នុងចំណោមអ្នកវិនិយោគរួចហើយ ដោយសារទីផ្សារមូលធនថៃមិនទាន់មានការអភិវឌ្ឍន៍គ្រប់គ្រាន់ ពោលការបង្កើនពន្ធនេះ ភាគច្រើនត្រូវបានអនុវត្តនៅក្នុងប្រទេសអភិវឌ្ឍន៍ ។

ដោយឡែក សម្រាប់ការដំឡើងពន្ធ​សាជីវកម្មដល់ ២៣ ភាគរយ, លោក Pichai លើកឡើងថា កាលរដ្ឋាភិបាល នាយករដ្ឋមន្ត្រីរបស់លោកស្រី យីងឡាក់ ស៊ីណាវ៉ាត់ត្រា គឺបានកាត់បន្ថយពន្ធសាជីវកម្មពី ៣០ ភាគរយមក ២៣ ភាគរយ និង ២០ ភាគរយ​ដើម្បីទាក់ទាញការវិនិយោគបរទេស ។ ក្រៅពីទាក់ទាញអ្នកវិនិយោគហើយ ការកាត់បន្ថយពន្ធសាជីវកម្មក៏ជួយឲ្យរដ្ឋាភិបាលប្រមូលពន្ធបានកាន់តែច្រើនផងដែរ ។

ប្រសិនសេដ្ឋកិច្ចមានភាពល្អប្រសើរ ហើយអ្នកវិនិយោគកាន់តែច្រើនចូលមកក្នុងប្រទេសថៃ នោះរដ្ឋាភិបាលនឹងអាចរកចំណូលពន្ធបានកាន់តែច្រើន ហើយបើតាមសម្តីលោក ថាក់ស៊ីន ស៊ីណាវ៉ាត្រា “តិចគឺច្រើន” ជាយុទ្ធសាស្ត្រ​ល្អ​បំផុត ។

ចំណែកឯពន្ធលើទ្រព្យសម្បត្តិ ០.៥ ភាគរយ លើអ្នកដែលមានទ្រព្យសម្បត្តិលើសពី ៣០០ លានបាត លោកបាននិយាយថា នេះអាចបណ្តាលឲ្យមានការដកថយពីការរៃអង្គាសប្រាក់នៅក្នុងទីផ្សារមូលធន ។ លោកបន្តថា ការប្រមូលពន្ធ​ពីអ្នកមានដើម្បីកាត់បន្ថយ​ភាពមិនស្មើគ្នា គឺត្រឹមត្រូវ​ ប៉ុន្តែគួរធ្វើវាដោយប្រុងប្រយ័ត្ន។

លោកបានបន្ថែមថា អ្នកដែលមានទ្រព្យសម្បត្តិលើសពី ៥០០ លានបាត គួរតែត្រូវបង់ពន្ធលើទ្រព្យសម្បត្តិ ជំនួសឲ្យអ្នកដែលមានទ្រព្យសម្បត្តិលើសពី ៣០០ លានបាត ។ លើសពីនេះ លោក​សម្ដែង​ការ​ព្រួយ​បារម្ភ​ថា អ្នក​ដែល​ទទួល​បាន​ដី​ជា​មរតក​នឹង​ត្រូវ​ជាប់​ពន្ធ​ទ្រព្យ​សម្បត្តិ ហើយ​ត្រូវ​លក់​ដី​បង់​ពន្ធបន្ថែម ៕

ប្រែសម្រួល៖ នាង​ រតនៈ

ប្រភព៖ Nation Thailand

ចុចអាន ៖ លោក ថាក់ស៊ីន បញ្ជាក់ច្បាស់ៗពីពេលវេលាវិលត្រឡប់ចូលស្រុកវិញ