លោក ថាក់ស៊ីន បញ្ជាក់ច្បាស់ៗពីពេលវេលាវិលត្រឡប់ចូលស្រុកវិញ

អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា បានបញ្ជាក់ច្បាស់ៗថា លោកនឹងវិលត្រឡប់ចូលស្រុកវិញនៅក្នុងខែកក្កដាខាងមុខនេះ ទោះបីជាមានផលវិបាកយ៉ាងណាក៏ដោយ បន្ទាប់ពីរស់នៅនិរទេសខ្លួនអស់រយៈពេលប្រមាណ ១៧ ឆ្នាំមកនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍ដែលថតនៅក្នុងប្រទេសសិង្ហបុរីកាលពីពេលថ្មីៗនេះ, លោក ថាក់ស៊ីន បាននិយាយថា ការប្រកាសចូលស្រុកទេសវិញរបស់លោកលើកនេះ គឹមិនខ្វល់ពីហានិភ័យដែលត្រូវបង្ខំឲ្យលោកជាប់ពន្ធនាគាររយៈពេល ១០ ឆ្នាំពីរត់ភៀសខ្លួនទៅក្រៅប្រទេសឡើយ ។

ទន្ទឹមនោះ លោក ថាក់ស៊ីន ដែលនឹងឈានដល់វ័យ ៧៤ ឆ្នាំនៅថ្ងៃទី២៦ ខែកក្កដាខាងមុខនេះ ក៏បានរំលឹកឡើងវិញនូវផែនការវិលត្រឡប់មកកាន់ប្រទេសថៃវិញដែរថា “ខ្ញុំធ្លាប់បាននិយាយ និងបញ្ជាក់ហើយពីគម្រោងមួយនេះ ជាពិសេសគឺខ្ញុំ​កំពុង​រង់​ចាំកូនស្រីរបស់ខ្ញុំ ផេថងថាន ​អ៊ុងអ៊ីង ស៊ីណាវ៉ាត់ត្រា ដើម្បី​កំណត់​កាលបរិច្ឆេទ និង​ពេល​វេលាសម្រាប់ខ្ញុំការវិលចូលស្រុកវិញ” ។

អតីតនាយករដ្ឋមន្ត្រីដ៏មានឥទ្ធិពលរបស់ប្រទេសថៃរូបនេះបានបញ្ជាក់បន្ថែមថា គោលបំណងវិលចូលស្រុកនេះផងដែរ មិនមែនផ្ដោតលើរឿងនយោបាយនោះទេ គឺលោក​​ចង់​មើល​ថែ​ចៅ​ទាំង ​៧ ​នាក់របស់លោក ដើម្បី​សម្រាល​បន្ទុក​ដល់ឪពុក​ម្តាយរបស់ពួកគេឲ្យ​ផ្ដោត​លើ​ការងារ ។

គួរបញ្ជាក់ថា រដ្ឋាភិបាលរបស់លោក ថាក់ស៊ីន ត្រូវបានទម្លាក់ចេញពីតំណែងដោយរដ្ឋប្រហារយោធា ដឹកនាំដោយលោកឧត្តមសេនីយ Sonthi Boonyaratglin នៅថ្ងៃទី១៩ ខែកញ្ញា ឆ្នាំ ២០០៦ ។ បន្ទាប់ពីបានភៀសខ្លួនចេញពីប្រទេស លោក ថាក់ស៊ីន ត្រូវបានកាត់ទោសកំបាំងមុខឲ្យជាប់ពន្ធនាគារសរុបចំនួន ១២ ឆ្នាំពីបទចោទប្រកាន់អំពើពុករលួយ គេចពន្ធ និងរំលោភអំណាចជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ រថភ្លើងបុកគ្នាពេញទំហឹងនៅ ឥណ្ឌា ស្លាប់មនុស្ស ២៣៣ នាក់ និង ៩០០ នាក់រងរបួស