ADB​ ប្តេជ្ញាផ្តល់ហិរញ្ញប្បទាន១,២៦៣ពាន់លានដុល្លារដើម្បីចូលរួមអភិវឌ្ឍន៍កម្ពុជាក្នុងរយៈ៥​ឆ្នាំ

ភ្នំពេញ៖ ធនាគារអភិវឌ្ឍន៍អាស៊ី ហៅកាត់ថា ADB បានអនុម័តនូវយុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជា ២០២៤-២០២៨ ជាមួយនឹងការផ្តល់ហិរញ្ញប្បទានផ្ទាល់ ក្នុងទំហំទឹកប្រាក់សរុបប្រមាណ ១,២៦៣ពាន់លានដុល្លារអាមេរិក។ សម្រាប់ហិរញ្ញ​ប្បទាននេះក៏ជាការ​ចូលរួមចំណែក​​ក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និង ក្លាយជាប្រទេសមានចំណូលខ្ពស់ឆ្នាំ ២០៥០ ។​ នេះបើយោងតាម​សេចក្តីប្រកាសព័ត៌មានរបស់ធនាគារមួយនេះ។

ថ្លែងក្នុង​ធីសម្ពោធស្ថានតំណាងថ្មី របស់ធនាគារអភិវឌ្ឍន៍អាស៊ី (ADB) នៅថ្ងៃទី ១២ ខែមិថុនា ឆ្នាំ២០២៤ នៅរាជធានីភ្នំពេញ​ លោក  អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ  ​ចំពោះកិច្ចសហប្រតិបត្តិការរវាងកម្ពុជា និងធនាគារអភិវឌ្ឍន៍អាស៊ី បានចូលរួមចំណែកដល់ការអភិវឌ្ឍនៅកម្ពុជាយ៉ាងច្រើន។

លោកថា ​គិតត្រឹមបំណាច់ ឆ្នាំ២០២៣ ADB បានផ្តល់ហិរញ្ញប្បទានសហប្រតិបត្តិការដល់កម្ពុជា សម្រាប់ហិរញ្ញប្បទានគម្រោងអភិវឌ្ឍន៍ចំនួនជាង ២០០គម្រោង មានទឹកប្រាក់សរុបចំនួនប្រមាណ ៤,៨ប៊ីលានដុល្លារអាមេរិក រួមមាន៖ ឥណទានសម្បទានចំនួន ៤,២ប៊ីលានដុល្លារអាមេរិក សម្រាប់ហិរញ្ញប្បទានគម្រោងចំនួន ១៣៧ ក្នុងនោះគម្រោងចំនួន ៨៨ ត្រូវបានបញ្ចប់ និងគម្រោងចំនួន ៤៩ កំពុងដំណើរការ។

លោកថា​សម្រាប់ហិរញ្ញប្បទានឥតសំណងវិញគឺមានទឹកប្រាក់ប្រមាណ ៥៦៨លានដុល្លារអាមេរិក គឺសម្រាប់ហិរញ្ញប្បទានគម្រោងចំនួន ៧០ ក្នុងនោះគម្រោងចំនួន ៤៤បានបញ្ចប់ និងចំនួន ២៦ កំពុងដំណើរការ។

លោកឧបនាយករដ្ឋមន្រ្តីបានលើកឡើងថា​៖« សម្រាប់​យុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជា ២០២៤-២០២៨ ដែលទើបតែអនុម័តថ្មីកន្លងមកនេះ ​នឹងជួយជំរុញល្បឿននៃការអភិវឌ្ឍន៍សង្គម-សេដ្ឋកិច្ចកម្ពុជា ឆ្ពោះទៅសម្រេចបាននូវបង្គោលចរឆ្នាំ ២០៣០ ក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់ និង ឆ្នាំ ២០៥០ ក្លាយជាប្រទេសមានចំណូលខ្ពស់»៕