សេដ្ឋកិច្ច

រដ្ឋមន្រ្តីការបរទេសថៃ៖ ថៃមានឆន្ទៈចូលប្លុក BRICS ឱ្យបានឆាប់តាមតែអាចធ្វើទៅបាន

បានផុស

២ years មុន

នៅ

ថ្ងៃព្រហស្បតិ៍ ១៣ មិថុនា ២០២៤

ដោយ

រដ្ឋមន្ត្រីការបរទេសថៃ លោក Maris Sangiampongsa បានថ្លែងថា ប្រទេសដែលមានសេដ្ឋកិច្ចធំបំផុតទី២នៅអាស៊ីអាគ្នេយ៍មួយនេះ មានឆន្ទៈដើម្បីចូលជាសមាជិករបស់អង្គការអន្តររដ្ឋាភិបាល ប្រ៊ីកស៍ (BRICS) ឱ្យបានឆាប់តាមដែលអាចធ្វើទៅបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Maris បានលើកឡើងយ៉ាងដូច្នេះ ក្នុងអំឡុងកិច្ចប្រជុំជាមួយរដ្ឋមន្រ្តីការបរទេសចិន លោក វ៉ាង យី នៅខាងក្រៅកិច្ចប្រជុំកំពូលរដ្ឋមន្ត្រីការបរទេស BRICS នៅទីក្រុង Nizhny Novgorod នៃប្រទេសរុស្ស៊ី។ នេះបើតាមសេចក្តីថ្លែងការណ៍ពីក្រសួងការបរទេសចិន ដែលចេញផ្សាយកាលពីថ្ងៃពុធ។

លោក Maris បានប្រាប់លោក វ៉ាង ថា៖ «ប្រទេសថៃមានឆន្ទៈចូលរួមជាមួយយន្តការ BRICS ឱ្យបានឆាប់តាមដែលអាចធ្វើទៅបាន (ហើយ) ដើរតួនាទីយ៉ាងសកម្មបន្ថែមទៀតនៅក្នុងកិច្ចសហប្រតិបត្តិការរវាងប្រទេសកំពុងអភិវឌ្ឍ និងពង្រឹងការសម្របសម្រួល និងកិច្ចសហប្រតិបត្តិការជាមួយប្រទេសចិន លើវេទិកាពហុភាគី»។

គួរគូសបញ្ជាក់ថា ការលើកឡើងរបស់លោក Maris ធ្វើឡើងបន្ទាប់ពីគណៈរដ្ឋមន្ត្រីដឹកនាំដោយនាយករដ្ឋមន្ត្រីលោក សេដ្ឋា ថាវីស៊ីន កាលពីចុងខែមុន បានអនុម័តលើសេចក្តីព្រាងលិខិតរបស់រដ្ឋាភិបាល ដែលថា ប្រទេសនេះនឹងដាក់ពាក្យសុំធ្វើជាសមាជិករបស់ BRICS ក្នុងគោលបំណងពង្រឹងសេដ្ឋកិច្ចដែលកំពុងធ្លាក់ចុះ និងជំរុញវត្តមានលើឆាកអន្តរជាតិរបស់ខ្លួន។

ថៃស្ថិតក្នុងចំណោមប្រទេសចំនួន ១៥ ដែលស្ថិតក្រោមការពិចារណាឱ្យចូលជាសមាជិកក្នុងកិច្ចប្រជុំជុំបន្ទាប់ ដោយរួមមានប្រទេសជិតខាងក្នុងតំបន់ផ្សេងៗទៀត ដូចជាវៀតណាម និងឥណ្ឌូណេស៊ី ជាដើម។

BRICS ដែលបង្កើតឡើងក្នុងឆ្នាំ ២០០៩ គឺជាប្លុកនៃប្រទេសមានសេដ្ឋកិច្ចកំពុងរីកចម្រើន ដែលរួមមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ ប្លុកនេះបានស្វាគមន៍អារ៉ាប៊ីសាអូឌីត អេហ្ស៊ីប អេត្យូពី អ៊ីរ៉ង់ និងអារ៉ាប់រួមជាសមាជិកពេញសិទ្ធិកាលពីខែមករា ដើមឆ្នាំនេះ។

យោងតាមជំនួយការប្រធានាធិបតីរុស្ស៊ី ទទួលបន្ទុកកិច្ចការបរទេស លោក Yury Ushakov ប្លុក BRICS បានវ៉ាដាច់ក្រុមប្រទេសអភិវឌ្ឍន៍ទាំង៧ (G7) លើអំណាចនៃការទិញ ដោយប្លុកនេះគ្រងលើ ៣៥,៦ ភាគរយនៃផលិតផលក្នុងស្រុកសរុប (GDP) របស់ពិភពលោក ខណៈ G7 មានត្រឹមតែ ៣០,៣ ភាគរយប៉ុណ្ណោះ៕

Related Topics: