ព័ត៌មានអន្ដរជាតិ

Honda ប្រកាសបិទ និងបឈ្ឈប់ផលិតកម្មរោងចក្រ២ផ្សេងគ្នានៅចិន

បានផុស

២ years មុន

នៅ

ថ្ងៃព្រហស្បតិ៍ ២៥ កក្កដា ២០២៤

ដោយ

ក្រុមហ៊ុនផលិតរថយន្តជប៉ុន Honda Motor បានឱ្យដឹងនៅថ្ងៃព្រហស្បតិ៍នេះថា ខ្លួននឹងបិទរោងចក្រមួយកន្លែង និងបញ្ឈប់ផលិតកម្មរថយន្តរបស់រោងចក្រមួយផ្សេងទៀត នៅក្នុងប្រទេសចិន ដោយនឹងពង្រឹងការផលិតរថយន្តអគ្គិសនីវិញ ចំពេលមានការប្រកួតប្រជែងកាន់តែខ្លាំងឡើងៗពីក្រុមហ៊ុនចិន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរបស់ក្រុមហ៊ុន បាននិយាយប្រាប់រ៉យទ័រថា ក្រុមហ៊ុន Honda នឹងបិទរោងចក្រដែលដំណើរការក្រោមការបណ្តាក់ទុនរួមគ្នាជាមួយក្រុមហ៊ុនផលិតរថយន្តរដ្ឋចិន Guangzhou Automobile Group (GAC Group) នៅខែតុលាខាងមុខ។

អ្នកនាំពាក្យដដែលបានឱ្យដឹងថា រោងចក្រដែលបិទនោះ បានបើកដំណើរការកាលពី២ទសវត្សរ៍មុន ដោយផលិតរថយន្ត Accord ដែលជាប្រភេទរថយន្ត Sedan ក្នុងសមត្ថភាពផលិតប្រចាំឆ្នាំប្រមាណ ៥០ ០០០ គ្រឿង។

ជាមួយគ្នានោះ Honda នឹងបញ្ឈប់ផលិតកម្មរថយន្តនៅរោងចក្រមួយទៀត ដែលដំណើរការក្រោមការបណ្ដាក់ទុនជាមួយក្រុមហ៊ុនរដ្ឋចិន Dongfeng Motor Corporation ចាប់ពីខែវិច្ឆិកាទៅ។ បើតាមអ្នកនាំពាក្យដដែល រោងចក្រនេះមានសមត្ថភាពផលិតកម្មរថយន្តប្រមាណ ២៤០ ០០០ គ្រឿង/ឆ្នាំ។

អ្នកនាំពាក្យបន្តថា Honda បានប្រឈមមុខនឹងលក្ខខណ្ឌដ៏លំបាកនៅក្នុងប្រទេសចិន ដែលជាទីផ្សារលក់រថយន្តដ៏ធំបំផុតរបស់ពិភពលោក។ ជាមួយនឹងការបិទរោងចក្រនេះ សមត្ថភាពផលិតរបស់ក្រុមហ៊ុនក្នុងស្រុកចិន នឹងធ្លាក់ចុះពី១,៤៩ លានគ្រឿង មកត្រឹម ១,២ លានគ្រឿង/ឆ្នាំ។

ទោះជាយ៉ាងណាក៏ដោយ Honda បានដាក់ផែនការឱ្យសម្រេចបាននូវផលិតកម្ម ១,៤៤ គ្រឿង/ឆ្នាំ នៅពេលបើកដំណើរការរោងចក្រផលិតរថយន្តអគ្គិសនីចំនួន២ ដែលជាការបណ្ដាក់ទុន ជាមួយក្រុមហ៊ុន GAC និងក្រុមហ៊ុន Dongfeng នៅចុងឆ្នាំនេះ។

គួរគូសបញ្ជាក់ថា ក្រុមហ៊ុនជប៉ុនផ្សេងៗដូចជា Honda និង Nissan ជាដើមនោះ ធ្លាក់កាន់កាប់ចំណែកទីផ្សារដ៏ធំនៅចិន ប៉ុន្តែការទំហំទីផ្សារបានធ្លាក់ចុះជាបន្តបន្ទាប់ ក្រោយក្រុមហ៊ុនផលិតរថយន្តក្នុងស្រុកហក់ឡើង ជាមួយនឹងការលក់រថយន្តក្នុងតម្លៃថោកជាង៕