ព័ត៌មានអន្ដរជាតិ

ថៃតម្រូវឱ្យអ្នកដំណើរបរទេស ត្រូវបំពេញ «ប័ណ្ណការមកដល់ឌីជីថល» ចាប់ពីខែឧសភា តទៅ

បានផុស

៤ ខែ មុន

នៅ

ថ្ងៃចន្ទ ២៧ មករា ២០២៥

ដោយ

ការិយាល័យអន្តោប្រវេសន៍របស់ប្រទេសថៃ គ្រោងនឹងតម្រូវឱ្យអ្នកកាន់លិខិតឆ្លងដែនបរទេសទាំងអស់ ត្រូវបំពេញព័ត៌មានសម្រាប់ប័ណ្ណការមកដល់ឌីជីថល ចាប់ពីថ្ងៃទី ១ ខែឧសភា តទៅ។ នេះបើតាមការរាយការណ៍របស់សារព័ត៌មាន The Strait Times ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្ញៀវបរទេសដែលចូលមកដល់ ឬចាកចេញពីប្រទេសថៃ តាមផ្លូវអាកាស គោក ឬសមុទ្រ ត្រូវតែបំពេញប័ណ្ណ ឈ្មោះថា ឯកសារ TM6 តាមអ៊ិនធឺណិត។ ការទាមទារនេះ អនុវត្តចំពោះអ្នកដំណើរបរទេសទាំងអស់ រួមទាំងអ្នកដែលមកពីប្រទេសទទួលបានការលើកលែងទិដ្ឋាការដូចជា ឥណ្ឌូណេស៊ី វៀតណាម និងសិង្ហបុរី។ យ៉ាងណាមិញ អ្នកកាន់លិខិតឆ្លងដែនថៃទាំងអស់ ត្រូវបានលើកលែងពីដំណើរការនេះ។

ប័ណ្ណឌីជីថល TM6 ដែលនឹងត្រូវប្រើជំនួសប័ណ្ណជាក្រដាសនាពេលបច្ចុប្បន្ន នឹងមិនគិតថ្លៃនោះទេ។ អ្នកធ្វើដំណើរ នឹងត្រូវបានតម្រូវឱ្យផ្តល់ព័ត៌មានលម្អិតផ្ទាល់ខ្លួន និងការធ្វើដំណើរ រួមទាំងព័ត៌មានលិខិតឆ្លងដែន និងអាសយដ្ឋានស្នាក់នៅនៅថៃ។

ជុំវិញកិច្ចការនេះ អនុរដ្ឋលេខាធិការក្រសួងទេសចរណ៍ និងកីឡាថៃ លោក Mongkon Wimonrat បានបញ្ជាក់ពីការផ្លាស់ប្តូរកាលពីថ្ងៃទី២១ ខែមករា បន្ទាប់ពីកិច្ចប្រជុំជាមួយការិយាល័យអន្តោប្រវេសន៍របស់ប្រទេសថៃ។

មន្រ្តីក្រសួងទេសចរណ៍ថៃ បានលើកឡើងថា ប័ណ្ណឌីជីថល TM6 គឺជាផ្នែកមួយនៃកិច្ចខិតខំប្រឹងប្រែងរបស់អាជ្ញាធរថៃ ដើម្បីកែលម្អការតាមដានភ្ញៀវទេសចរក្នុងអំឡុងពេលស្នាក់នៅរបស់ពួកគេ។ ការដាក់ឱ្យប្រើប្រាស់ប័ណ្ណឌីជីថលនេះ ក៏មានគោលបំណងស្តារទំនុកចិត្តលើបញ្ហាសន្តិសុខថៃផងដែរ ជាពិសេសក្នុងចំណោមអ្នកទេសចរចិន បន្ទាប់ពីករណីជួញដូរមនុស្សលើតួសម្ដែងចិន ដែលធ្វើឱ្យមានការព្រួយបារម្ភលើសុវត្ថិភាព៕