វិបត្តិអចលនទ្រព្យចិន៖ តម្លៃផ្ទះថ្មីនៅចិន ធ្លាក់ចុះ​នៅខែកុម្ភៈ

តម្លៃផ្ទះថ្មីនៅក្នុងប្រទេសចិន​បាន​ធ្លាក់ចុះជាថ្មីកាលពីខែកុម្ភៈ ​ខណៈ​គោលនយោបាយជំរុញតម្រូវការ​របស់​រដ្ឋាភិបាល​មិន​ទាន់មាន​ប្រសិទ្ធិភាពខ្លាំងនៅក្នុងវិបត្តិអចលនទ្រព្យ​ដែលបន្តអូសបន្លាយរបស់ប្រទេសនេះ​​។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ​។

តម្លៃផ្ទះថ្មីខែកុម្ភៈ បាន​ធ្លាក់ចុះ ០,១ ភាគរយ ​ធៀប​នឹង​ខែមករា ក្រោយ​តម្លៃវា​នៅថេរប្រមាណរយៈពេល​ ២ ខែ​មុន​នោះ។ នេះបើតាមការគណនារបស់រ៉យទ័រ ដោយ​ផ្អែកលើទិន្នន័យដែលចេញដោយ​ការិយាល័យស្ថិតិជាតិ​ចិន (NBS)​។

ក្នុងអត្រាប្រចាំឆ្នាំ តម្លៃផ្ទះនៅខែ​កុម្ភៈ បានធ្លាក់ចុះ​ ៤,៨ ភាគរយ ធៀប​នឹង​ការធ្លាក់ចុះ ៥ ភាគរយ នៅខែមករា។ ទិន្នន័យរបស់ NBS ក៏បានបង្ហាញផងដែរ​ពីការធ្លាក់ចុះនៃតម្លៃផ្ទះលក់បន្តនៅក្នុងទីក្រុងលំដាប់ទី ១ លំដាប់ទី ២ និងលំដាប់ទី ៣ ​ទាំងប្រចាំខែ និងប្រចាំឆ្នាំ។

កន្លងមក រដ្ឋាភិបាលក្នុងតំបន់តាម​ទីក្រុងជាច្រើន ផ្តល់ការណែនាំក្រៅផ្លូវការដល់​ក្រុមហ៊ុន​អភិវឌ្ឍន៍អចលនទ្រព្យ​លើការកែតម្រូវតម្លៃផ្ទះថ្មី ដោយធ្វើឱ្យតម្លៃទាំងនេះក្លាយជារង្វាស់ដែលមិនអាចជឿទុកចិត្តបាន​សម្រាប់​​តម្រូវការទីផ្សារ។

គួរគូស​បញ្ជាក់ថា​ ការធ្លាក់ចុះនៃតម្លៃផ្ទះថ្មីនៅចិន​ គឺឆ្លុះបញ្ចាំងអំពីការជាប់គាំង​នៃវិបត្តិអចលនទ្រព្យ​​ ដែលមាន​ឥទ្ធិពល​ខ្លាំង​លើ​កំណើនសេដ្ឋកិច្ចរបស់ប្រទេសទាំងមូល​។ ដើម្បីដោះស្រាយវិបត្តិ​នេះ រដ្ឋាភិបាល​ចិនបានអនុវត្តវិធានការផ្សេងៗ ដូចជាកាត់បន្ថយអត្រាប្រាក់កម្ចីទិញផ្ទះ កាត់បន្ថយអត្រាបង់រំលោះជាអប្បបរមា និងការផ្តល់ជំនួយហិរញ្ញវត្ថុសម្រាប់សហគ្រាសរដ្ឋក្នុងការទិញ​អចលនទ្រព្យដែល​លក់មិនចេញ​ ក្នុងគោលបំណងជំរុញតម្រូវការ និងស្ថិរភាពទីផ្សារអចលនទ្រព្យ៕