ក្រសួងកសិកម្ម អំពាវនាវឱ្យម្ចាស់ចម្ការទុរេនប្រញាប់​មក​ចុះបញ្ជីនាំចេញទៅទីផ្សារចិន

អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានអំពាវនាវ​ដល់ម្ចាស់​ចម្ការ​ទុរេន រោងចក្រកែច្នៃ និងវេចខ្ចប់ផ្លែទុរេនស្រស់ដែល​មានបំណង​នាំចេញទៅទីផ្សារ​ចិនរួស​រាន់​ដាក់​ពាក្យស្នើសុំចុះបញ្ជី បន្ទាប់ពីចិនបានអនុ​ញ្ញាត​ឱ្យនាំចេញទុរេនកម្ពុជាទៅទីផ្សាររបស់ខ្លួន។

សេចក្ដីជូនដំណឹងរបស់ អគ្គនាយកដ្ឋានកសិកម្មបញ្ជាក់ថា៖ «សូមអំពាវនាវដល់ម្ចាស់ចម្ការទុរេន សហគមន៍កសិកម្មទុរេន និងម្ចាស់រោងចក្រកែច្នៃនិងវេចខ្ចប់ផ្លែទុរេនស្រស់ ដែលមានបំណង​ផលិត​និងកែច្នៃវេចខ្ចប់ នាំចេញផ្លែទុរេនស្រស់ទៅកាន់ទីផ្សារប្រទេសចិន រួសរាន់ដាក់ពាក្យស្នើ​សុំចុះ​បញ្ជីចម្ការ និងរោងចក្រកែច្នៃនិងវេចខ្ចប់ ផ្លែទុរេនស្រស់ សម្រាប់នាំចេញទៅកាន់​ប្រទេស​ចិននៅអគ្គនាយកដ្ឋានកសិកម្ម»។

អគ្គនាយកដ្ឋានកសិកម្ម គ្រោងនឹងបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ផ្លែទុរេន​ស្រស់​ទៅកាន់ភាគីចិននៅអំឡុងខែឧសភា ឆ្នាំ២០២៥ ខាងមុខនេះ ដើម្បីភាគីចិនពិនិត្យ និងវាយតម្លៃបញ្ចប់មុននឹងឈានដល់ការនាំចេញជាផ្លូវការ។

លោក ហេង ឆេងលី ប្រធានសហគមន៍ទុរេនបែកអន្លូង ស្រុកស្ទឹងត្រង់ ខេត្តកំពង់ចាម ប្រាប់​កម្ពុ​ជាថ្មីថា អគ្គនាយកដ្ឋានកសិកម្មនៃក្រសួងកសិកម្មធ្លាប់​បញ្ជូនមន្ត្រីជំនាញចុះទៅត្រួតពិនិត្យ​ចម្ការ​ក្នុង​សហគមន៍រួចហើយ ក្នុងនោះគាត់ជ្រើសរើស​យកចម្ការចំនួន ១០ ដែលអ្នកជំនាញបានផ្ដល់​ដំបូន្មានណែនាំពីការរៀបចំចម្ការ ខណៈសហគមន៍បានស្នើចុះបញ្ជីសម្រាប់​ការបញ្ជាក់វិញ្ញា​បនបត្រការអនុវត្តកសិកម្មល្អ(Cam-GAP)។

លោក ហេង ឆេងលី បញ្ជាក់ថា ចម្ការសហគមន៍របស់លោកប្រមាណជាង ៦០ បន្ថែមទៀត គ្រោងនឹងរៀប​ចំចុះបញ្ជី ដើម្បីថ្នាក់ជាតិចុះពិនិត្យកែតម្រូវ មុនពេលចិនមកត្រួតពិនិត្យ។ លោកថា៖ «ប្រសិនបើទុរេនកម្ពុជាមានឱកាសនាំចេញទៅទីផ្សារចិន កាន់​តែ​ល្អ​សម្រាប់ទុរេនយើងសម្រាប់កសិករគាត់មានជម្រើសច្រើន»។

រដូវកាលប្រមូលផលទុរេននៅឆ្នាំ ២០២៥ បានចាប់ផ្ដើមបណ្ដើរៗ​ជាមួយ​នឹង​ប្រ​ភេទ​ពូជ​ទុរេន មូសាំងឃីង និងពូជស្រាលមួយចំនួនទៀត ខណៈទុរេនមាន់ថង នឹងអាច​ប្រ​មូផល​បាន​នៅដើមខែឧសភានេះ។

លោក ហេង ឆេងលី ប្រាប់ថា ទិន្នផលឆ្នាំនេះល្អប្រសើរ បើធៀបនឹងឆ្នាំមុន ខណៈតម្លៃ​ប្រភេទ​ពូជ​មូសាំងឃីងបានល្អចន្លោះពី ១ ម៉ឺន ៧ ពាន់ ដល់ ២ ម៉ឺន ៥ ពាន់រៀល លក់ចេញពីចម្ការ។

យោងតាមក្រសួងកសិកម្ម នៅឆ្នាំ ២០២៤ កម្ពុជាបាននាំទុរេនចេញប្រមាណ ៧ ពាន់តោន ខណៈកម្ពុជាមានផ្ទៃដីដាំចុះទុរេន ៩ ពាន់ហិកតា ក្នុងនោះផ្ទៃ​ដីប្រមូល​ផលប្រមាណ ៥ ពាន់ហិកតា៕

អត្ថបទ៖ ឡេង ដេត