ថៃកត់ត្រាពីកំណើនភ្ញៀវទេសចរអន្តរជាតិតិចតួច ៤ ខែដើមឆ្នាំ

​​ក្រសួង​ទេសចរណ៍ និង​កីឡា​ថៃ បាន​ឱ្យដឹងកាល​ពី​ថ្ងៃ​អង្គារ ប្រទេស​ថៃ​បាន​ទទួល​ភ្ញៀវទេសចរអន្តរជាតិប្រមាណ ១១​,៨៤ លាន​នាក់ គិតត្រឹមមកទល់ពេលនេះ ពោលគឺកើនឡើងត្រឹមតែ ០,១២ ភាគរយ ប៉ុណ្ណោះ ធៀប​នឹង​រយៈពេលដូចគ្នាកាលពីឆ្នាំមុន។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

​ក្រសួងបន្ថែមថា ក្នុងចំណោម​នោះ ភ្ញៀវទេសចរចិន​រួមចំណែកប្រមាណ ១,៦ លាន​នាក់។

ទោះបីជាកំណើនតិចតួចក្ដី ក្រសួង​ទេសចរណ៍ថៃនៅតែរក្សាការព្យាករ​ការមកដល់របស់ភ្ញៀវទេសចរអន្តរជាតិប្រមាណ ៣៨ លាន​នាក់នៅឆ្នាំនេះ។

គេមើលឃើញថា ប្រទេស​បាន​ជួបប្រទះនឹងបញ្ហាសំខាន់ៗដែលប៉ះទង្គិចដល់ទំនុកចិត្តទេសចរ។ កាលពីចុងខែមីនា ​រញ្ជួយដីកម្រិត ៧,៧ រុិចទ័រ បាន​វាយប្រហារនៅប្រទេសមីយ៉ាន់ម៉ា ហើយរាលដាលដល់ទីក្រុងបាងកក ដោយ​បង្កការស្លាប់ និងការខូចខាតផ្សេងៗ។ ​

កាលពីដើមឆ្នាំទៀតសោត ថៃបានប្រឈមមុខនឹងករណីជួញដូរមនុស្ស ជុំវិញ​ការណ៍ដែលថា ឧក្រិដ្ឋជនប្រើប្រាស់ទឹកដីថៃដើម្បី​ចាប់តួសម្ដែងចិនម្នាក់ យក​ទៅបង្ខំឱ្យធ្វើការក្នុងកន្លែងបោកប្រាស់អនឡាញនៅមីយ៉ាន់ម៉ា ក្បែរព្រំដែនថៃ។ ក្រោយករណីនេះផ្ទុះឡើង ភ្ញៀវទេសចរចិន​ជាច្រើនបាន​លុបចោលដំណើរកម្សាន្តទៅថៃរបស់ខ្លួន ហើយការធ្លាក់ទំនុកចិត្តទេសចរចំពោះបញ្ហានេះបានរាលដាលដល់ទីផ្សារផ្សេងៗទៀត៕