ថៃជំរុញចាត់វិធានការបន្ទាន់ ដោយបារម្ភពី​វិបត្តិកំណើនភ្ញៀវទេសចរបរទេសតិចតួច

កំណើននៃការមកដល់របស់ភ្ញៀវទេសចរបរទេសក្នុងប្រទេសថៃ កំពុងធ្លាក់ចុះដល់កម្រិតធ្ងន់ធ្ងរ ដែលជំរុញឱ្យរដ្ឋមន្ត្រីក្រសួងទេសចរណ៍ និងកីឡា លោក Sorawong Thienthong ជួបជាមួយវិស័យឯកជនដើម្បីដោះស្រាយបញ្ហានេះជាបន្ទាន់ និងកាត់បន្ថយផលប៉ះពាល់​។ នេះបើតាមការចុះផ្សាយរបស់កាសែត The Nation។

កិច្ចប្រជុំនោះ មានការចូលរួមពីភាគីពាក់ព័ន្ធសំខាន់ៗពីវិស័យទេសចរណ៍ឯកជន​ រួមមានសមាគមភ្នាក់ងារទេសចរណ៍ថៃ (ATTA) សមាគមសណ្ឋាគារថៃ (THA) ក្រុមប្រឹក្សាទេសចរណ៍ថៃ (TCT) និងសមាគមអាកាសចរណ៍ថៃ។

លោក Sorawong បានទទួលស្គាល់ថា ​កំណើនភ្ញៀវទេសចរអន្តរជាតិក្នុងប្រទេសថៃបច្ចុប្បន្ន កំពុងធ្លាក់ដល់​កម្រិត​ធ្ងន់​ ដោយមានការព្រួយបារម្ភពីក្រសួង និងវិស័យឯកជន។ ទោះ​យ៉ាង​ណា លោក​បាន​កត់​សម្គាល់​ថា ស្ថានការណ៍​នៅ​តែ​អាច​គ្រប់​គ្រង​បាន ​ប្រសិន​បើ​មាន​វិធានការ​បង្ការ​យ៉ាង​ឆាប់​រហ័ស។ លោកបន្ថែមយ៉ាងដូច្នេះថា៖ «​ទេសចរណ៍នៅតែជាម៉ាស៊ីនដ៏រឹងមាំតែមួយគត់សម្រាប់ជំរុញសេដ្ឋកិច្ចរបស់យើងនៅពេលនេះ។ យើងត្រូវតែធ្វើគ្រប់សកម្មភាព តាមដែលយើងអាចធ្វើទៅបាន»។

លោក Sorawong បានបន្ថែមថា ចាប់តាំងពីដើមឆ្នាំ ២០២៥ មក ការមកដល់​នៃភ្ញៀវពីទីផ្សារធំៗមួយចំនួន ដូចជាប្រទេសចិន បានធ្លាក់ចុះ។ ​យ៉ាងណាមិញ ប្រាក់ចំណូល​ទេសចរណ៍បានកើនឡើង បើធៀបនឹងរយៈពេលដូចគ្នាក្នុងឆ្នាំ ២០២៤ ​ដែលបង្ហាញថា ភ្ញៀវទេសចរកំពុងចំណាយកាន់តែច្រើនក្នុងមនុស្សម្នាក់។

ចាប់ពីថ្ងៃទី ១ ខែមករា ដល់ថ្ងៃទី ២៧ ខែមេសា ​ថៃ​បានទទួលភ្ញៀវទេសចរបរទេសចំនួន ១១,៨៤ លាន​នាក់ ​ដោយ​កើនឡើងតិចតួចបំផុត ត្រឹម ០,១២ ភាគរយ ជាមួយ​នឹង​ចំណូល ៥៦៥,៦ ប៊ីលាន​បាត។ ​

លោក Sorawong បានសង្កត់ធ្ងន់ថា កត្តាចម្បងដែលរួមចំណែកដល់ការធ្លាក់ចុះនៃកំណើនភ្ញៀវនេះ ​រូបភាពពាក់ព័ន្ធនឹង​សុវត្ថិភាព​របស់ថៃ។ ​ក្រៅពីនេះ ក៏មានការព្រួយបារម្ភផងដែរ អំពីតម្លៃខ្ពស់សម្រាប់ទំនិញ និងសេវាកម្មដែលទាក់ទងនឹងទេសចរណ៍ ដូចជាសណ្ឋាគារ កន្លែងទេសចរណ៍ និងជើងហោះហើរ៕