តម្លៃប្រេងកើនជាង ២% នៅថ្ងៃចន្ទ ជុំវិញផលិតកម្មប្រេង OPEC+

តម្លៃប្រេងអន្តរជាតិបាន​កើនឡើងជាង ១ ដុល្លារ សម្រាប់នៅចន្ទនេះ ដែលជាថ្ងៃបើកការជួញដូរប្រចាំសប្ដាហ៍ នៅពេលអង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) បាន​សម្រេចចិត្តបង្កើនផលិតកម្មប្រចាំខែកក្កដា ប្រហែលនឹងខែមិថុនា និងឧសភា ដោយបង្ធូរបន្ថយក្ដីបារម្ភជុំវិញលទ្ធភាពបង្កើនផលិតកម្មច្រើនជាងនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគតម៉ាក Brent បាន​កើនឡើង ១,៣៨ ដុល្លារ ឬ ២,២០ ភាគរយ ដោយជួញដូរនៅតម្លៃ ៦៤,១៦ ដុល្លារ/បារ៉ែល គិតត្រឹមម៉ោងជិត ១ រសៀល ម៉ោងនៅក្រុងហុងកុង។ ចំណែកឯតម្លៃប្រេងអាមេរិក WTI វិញ បាន​កើនឡើង ១,៥៥ ដុល្លារ ឬ ២,៥៥ ភាគរយ ដោយ​ជួញដូរនៅតម្លៃ ៦២,៣៤ ដុល្លារ/បារ៉ែល។ តម្លៃប្រេងទាំង២ ធ្លាក់ចុះជាង ១ ភាគរយ កាលពីសប្ដាហ៍មុន។

កាលពីថ្ងៃសោរ៍ បាន​សម្រេចដំឡើងផលិតកម្ម ៤១១ ០០០ បារ៉ែល/ថ្ងៃ នៅខែកក្កដា ជាខែទី៣ ដែលប្លុកនេះដំឡើងផលិតកម្មក្នុងបរិមាណនេះ។ កន្លងមក ប្លុកបាន​ពិភាក្សាគ្នាពីការបង្កើនផលិតកម្មទ្រង់ទ្រាយធំ។ ការបង្កើនផលិតកម្មប្រេងច្រើនរបស់ OPEC+ មាន​ន័យថា ការផ្គត់ផ្គង់ប្រេងមានកាន់តែច្រើននៅលើទីផ្សារ ​ដែលអាចធ្វើឱ្យ​តម្លៃវាធ្លាក់ចុះ។

កំណើនប្រេងនៅថ្ងៃចន្ទនេះ ក៏បណ្ដាលមក​ពី​កម្រិតទាបនៃប្រេងក្នុងស្តុកអាមេរិកផងដែរ ខណៈ​អាជ្ញាធរ​ឧត្តុនិយមព្យាករពីចំនួនព្យុះសង្ឍរាខ្ពស់ជាងធម្មតា ដែលអាចជំរុញតម្រូវការបន្ថែម។

លើសពីនេះ ក្រុមហ៊ុនឧស្សាហកម្មថាមពល Baker Hughes បាននិយាយ​ក្នុងរបាយការណ៍ប្រចាំសប្តាហ៍របស់ខ្លួនកាលពីថ្ងៃសុក្រថា ចំនួនអណ្តូងប្រេងប្រតិបត្តិការនៅសហរដ្ឋអាមេរិក បានធ្លាក់ចុះ​កាលពីសប្តាហ៍មុន ​បានធ្លាក់ចុះចំនួន ៤ មកត្រឹម ៤៦១ កន្លែង ដែលជាកម្រិតទាបបំផុតរាប់តាំងពីខែវិច្ឆិកា ឆ្នាំ ២០២១៕ ​