កសិករនៅខេត្តមណ្ឌលគិរីម្នាក់ដាំដំណាំពូជពីកូរ៉េ កំពុងមានទីផ្សារល្អ

កសិករនៅខេត្តមណ្ឌលគិរីម្នាក់ សាកល្បងដាំដំណាំពូជពីប្រទេសកូរ៉េខាងត្បូង កំពុងតែមានទីផ្សារល្អ ខណៈដំណាំនេះមិនសូវមានអ្នកដាំច្រើននៅឡើយ។

ស្ថិតក្នុងវ័យ ៥៥ឆ្នាំ លោក ផិន ផន ជាកសិករដំាដំណាំខាត់ណាមើម ឬហៅម្យ៉ាងទៀតថា (ស៊ូហាវ) ប្រាប់ កម្ពុជាថ្មី ថា ដំណាំស៊ូហាវនេះ លោកបានសាកល្បងដាំវាទើបតែប៉ុន្មានឆ្នាំនេះតែប៉ុណ្ណោះ តែអ្វីដែលទទួលបានគឺដំណាំប្រភេទនេះ វាមានទីផ្សារល្អ ប្រសិនបើធៀបនឹងការដាំស្ពៃក្ដោប។

​កសិកររូបនេះ បញ្ជាក់ដែរថា «ស៊ូហាវជាដំណាំមួយប្រភេទងាយស្រួលដាំ មិនខុសអ្វីពីស្ពៃបូកគោ និងស្ពៃក្ដោបរបស់ខ្មែរនោះឡើយ! ពោលគឺដាំត្រឹមតែរយៈពេល២ខែកន្លះ ក៏អាចប្រមូលផលលក់បានហើយ»។

​

ចំពោះតម្លៃវិញ លោក ផិន ផន បានឱ្យដឹងថា ស៊ូហាវ ឬខាត់ណាមើមនេះ អាចលក់ចេញទៅកាន់ទីផ្សារបានក្នុងតម្លៃ ៤០០០រៀល ទៅ ៥០០០រៀល ក្នុងមួយគីឡូក្រាម។ ចំណែកទីផ្សារលក់ចេញវិញ មានដូចជាផ្សារទំនើបមួយចំនួនក្នុងរាជធានីភ្នំពេញ និងលក់ផ្ទាល់នៅចម្ការខ្លះផងដែរ។

ខាត់ណាមើម ឬស៊ូហាវ ត្រូវបានប្រជាជនកូរ៉េនិយមដាំសម្រាប់បរិភោគ ព្រោះគេអាចយកវាទៅស្ងោរស៊ុប និងនៅប្រទេសខ្លះទៀតយកទៅកែច្នៃធ្វើបុកល្ហុងជំនួសពេលដែលគ្មានល្ហុង។ ក្រៅពីនេះ ដំណាំប្រភេទនេះ ប្រជាជននៅប្រទេសកូរ៉េ យល់ថាវាមានអត្ថប្រយោជន៍ច្រើនចំពោះសុខភាព ព្រោះវាជាបន្លែម្យ៉ាងដែលអាចជំនួសការប្រើប៊ីចេង និងស្ករ បានថែមទៀតផង។ នេះបើតាមការបញ្ជាក់របស់ លោក ផិន ផន។

យ៉ាងណាមិញ លោក ផិន ផន ក៏បានឱ្យដឹងទៀតថា សម្រាប់ការដាំសាកល្ប​ងនេះ លោកអាចប្រមូលផលបានត្រឹមតែ ៥០០គីឡូតែប៉ុណ្ណោះ ខណៈលោកមិនទាន់ហ៊ានដាំច្រើន ដ្បិតអីដំណាំនេះនៅពុំសូវមានអ្នកស្គាល់ច្រើន នោះឡើយ៕

អត្ថបទ ៖​ សួស សិត