បណ្ដាសណ្ឋាគារ​ថៃ​​បញ្ចុះតម្លៃ​បន្ទប់ស្នាក់នៅ ​ក្នុងបរិបទវិបត្តិទេសចរណ៍

វិស័យសណ្ឋាគាររបស់ប្រទេសថៃ កំពុងប្រឈមមុខនឹង «សម្ពាធតម្លៃ» ​ដោយ​ប្រតិបត្តិករសណ្ឋាគារចាប់ផ្តើមបញ្ចុះតម្លៃបន្ទប់ស្នាក់នៅដើម្បីរក្សាចំណែកទីផ្សារ និង​ការស្នាក់នៅរបស់ភ្ញៀវ ចំពេលដែល​ប្រទេស​ប្រឈមមុខនឹង​វិបត្តិនៃការ​ធ្លាក់ចុះភ្ញៀវទេសចរពីបរទេស។ ​

តាមការចុះផ្សាយរបស់កាសែតបាងកកប៉ុស្តិ៍ ក្រុមហ៊ុនទីផ្សារមូលធន Tris Rating បាន​និយាយក្នុងរបាយការណ៍ «Industry Spotlight» ដែលចេញផ្សាយនាពេល​ថ្មីៗនេះថា តម្លៃបន្ទប់ស្នាក់នៅជាមធ្យមបាន​កើនឡើងជិតទ្វេដងចាប់តាំងពីឆ្នាំ ២០២១ មក ប៉ុន្តែការធ្លាក់ចុះ​ចំនួនភ្ញៀវទេសចរ ជាពិសេសពី​ចិន និងទីផ្សារអាស៊ីសំខាន់ៗផ្សេងទៀត ​កំពុងបង្ខំឱ្យសណ្ឋាគារកាត់បន្ថយតម្លៃ។

របាយការណ៍ថា អត្រាស្នាក់នៅរបស់សណ្ធាគារថៃក្រោយវិបត្តិកូវីដ១៩ បាន​​កើន​ដល់កម្រិតខ្ពស់នៅឆ្នាំ ២០២៤ ហើយបើមែនទែនទៅ វាថែមទាំង​ខ្ពស់ជាងអត្រាមុនសម័យកូវីដ១៩ទៀត​ផង។

យ៉ាងណាមិញ សន្ទុះបែបនេះ មិនមានទៀត​នោះទេនៅឆ្នាំ ២០២៥ នេះ ទោះបីជាទេសចរណ៍ក្នុងស្រុកមានភាពរឹងមាំក៏ដោយ​ ដែល​នោះគឺដោយសារតែការធ្លាក់ចុះនៃទំនុកចិត្តទេសចរ និងការមកដល់របស់ភ្ញៀវទេសចរបរទេស។ ​Tris បានព្យាករថា អត្រាស្នាក់នៅអាចនៅដដែល ឬក៏ធ្លាក់ចុះនៅឆ្នាំនេះ។

ការបញ្ចុះតម្លៃស្នាក់នៅរបស់បណ្ដាសណ្ធាគារថៃ កំពុងមាន​លក្ខណៈប្រកួតប្រជែងគ្នា ហើយ​ធ្វើឱ្យអត្រាតម្លៃជាមធ្យមធ្លាក់ចុះទៅតាមនោះដែរ​ ជាពិសេសក្នុងចំណោម​សណ្ធាគារ​លំដាប់ខ្ពស់នៅទីក្រុងបាងកក ដែលឥឡូវនេះពឹងផ្អែក​លើការផ្សព្វផ្សាយបែបឯកជន (Unpublished promotions) និងការកាត់បន្ថយតម្លៃស្នាក់នៅ ​ដើម្បីរក្សាការប្រកួតប្រជែងក្នុងអំឡុងរដូវកាលទាប។

វិបត្តិទេសចរណ៍នឹងនៅតែបន្តខ្សោយ ដោយ​ Tris បាន​ព្យាករថា ចំនួនភ្ញៀវទេសចរឆ្នាំនេះ នឹង​ធ្លាក់ចុះមកត្រឹម ៣៣,១ លាន​នាក់ ខណៈរយៈពេល ៣៤ សប្ដាហ៍​ ដើមឆ្នាំ ថៃបាន​ស្វាគមភ្ញៀវប្រមាណ ២១,៤ លាន​នាក់ ពោលគឺធ្លាក់ចុះប្រមាណ ៧ ភាគរយ រួច​ហើយ។ ​

ជាលម្អិត​ ការមកដល់របស់ភ្ញៀវចិន​ នឹងធ្លាក់ចុះមកនៅត្រឹម ៤,៦ លាននាក់ ឆ្នាំនេះ ពីប្រមាណ ៦,៧ លាននាក់នៅឆ្នាំមុន ខណៈ ៧ ខែដើមឆ្នាំ ទីផ្សារដដែល​បាន​ធ្លាក់ចុះប្រមាណ ៣៥ ភាគរយ បាត់ទៅហើយ។ ​Tris កត់​សម្គាល់​ថា អ្នក​ធ្វើ​ដំណើរ​ចិន​កំពុង​ផ្លាស់​ប្តូរ​ទៅ​កាន់​គោល​ដៅ​ដូច​ជា​ប្រទេស​ជប៉ុន និង​វៀតណាម ដែល​ប្រទេស​ទាំង​ពីរ​មាន​កំណើន​ខ្លាំង។

​Tris ក៏​បាន​ព្រមាន​ទៀត​ថា ភាព​តានតឹង​ព្រំដែន​កម្ពុជា-ថៃ ដែល​កំពុងបន្ត ​​​អាច​បង្ក​ហានិភ័យ​បន្ថែម​ទៀត​ដល់​វិស័យ​ទេសចរណ៍​ទាំង​ក្នុង​ និង​ក្រៅ​ប្រទេស ប្រសិន​បើ​វាអូស​បន្លាយរយៈពេល​​យូរ។

គួរគូសបញ្ជាក់ថា អ្នកជំនាញ​បាន​លើកឡើងថា វិស័យទេសចរណ៍ថៃ​កំពុងធ្លាក់ចូលទៅក្នុងវិបត្តិដោយ​សារ​តែបញ្ហាផ្សេងៗ រួមទាំងកង្វល់សុវត្ថិភាព ការផ្លាស់ប្ដូរចំណាប់អារម្មណ៍របស់ភ្ញៀវ ភាពមិនប្រាកដប្រជានៃសេដ្ឋកិច្ចសកល និងបញ្ហាភូមិសាស្រនយោបាយ កម្សោយនៃការប្រកួតប្រជែងរបស់ថៃ និងជម្លោះព្រំដែនជាដើម៕