អត្រាតម្លៃប្រេងប្រចាំសប្ដាហ៍នេះ អាចធ្លាក់ចុះខ្លាំងបំផុត​​ក្នុងរយៈពេលជាង ៣ ខែ

តម្លៃប្រេង​អន្តរជាតិ​សម្រាប់ការជួញដូរ​នៅព្រឹកថ្ងៃសុក្រនេះ បាន​កើនឡើងបន្តិចមកវិញក្រោយ​ធ្លាក់ចុះ ៤​ ថ្ងៃជាប់ៗគ្នា ដែល​អាច​ឱ្យ​អត្រាតម្លៃ​​ប្រចាំសប្ដាហ៍នេះ ​ធ្លាក់ចុះ​ខ្លាំង​បំផុត​ក្នុងរយៈពេល ៣ ខែ ដោយសារតែ​កំណើន​នៃការផ្គត់ផ្គង់​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក ​Brent បានកើនឡើង ១៨ សេន ឬ ០,៣ ភាគរយ ដល់ ៦៤,២៩ ដុល្លារ/បារ៉ែល គិតត្រឹមម៉ោង ៨ ព្រឹក នៅទីក្រុងហុងកុង ខណៈប្រេងឆៅអាមេរិក ម៉ាក West Texas Intermediate (WTI) បានកើនឡើង ១៩ សេន ឬ ០,៣ ភាគរយ ដល់ ៦០,៦៧ ដុល្លារ/បារ៉ែល។ ​

ក្នុងអត្រាប្រចាំសប្ដាហ៍ តម្លៃប្រេង​ Brent បាន​ធ្លាក់ច់ុះ ៨,៣ ភាគរយ ខណៈ WTI បាន​ធ្លាក់ចុះ ៧,៦ ភាគរយ ដែល​នេះការធ្លាក់ចុះខ្លាំងបំផុត រាប់តាំងពីចុងខែមិថុនា។

ប្រសិនបើតម្លៃស្ទុះងើប​ឡើងវិញនៅថ្ងៃសុក្រនេះ ដែលជាថ្ងៃបិទការជួញដូរ​ប្រចាំសប្ដាហ៍នោះទេ តម្លៃប្រេង Brent អាចស្ថិតនៅក្នុងកម្រិតទាបបំផុត រាប់តាំងពីសប្ដាហ៍ដែលបិទការជួញដូរ​នៅថ្ងៃ ៣០ ឧសភា ​និង​ WTI ​រាប់តាំងពីថ្ងៃទី ២ ឧសភា។

ការធ្លាក់ចុះតម្លៃប្រេងក្នុងរយៈពេលប៉ុន្មានថ្ងៃចុងក្រោយ​ កើតឡើងក្រោយមានសេចក្ដីរាយការ៍ថា អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) ​អាច​ព្រមព្រៀងគ្នា​លើការបង្កើនផលិតកម្ម​ប្រេង ៥០០ ០០០ បារ៉ែល/ថ្ងៃ នៅខែវិច្ឆិកា​។

អ្នកវិភាគទីផ្សារបាន​និយាយថា ​កំណើន​ការផ្គត់ផ្គង់ OPEC+ ការថយចុះនៃការចម្រាញ់ប្រេង និងកម្សោតម្រូវការតាមរដូវកាល អាចនាំឱ្យស្តុកប្រេងកើនឡើង។ ​​រដ្ឋបាលព័ត៌មានថាមពល (EIA) ស្តុកប្រេង​របស់សហរដ្ឋអាមេរិក បានកើនឡើងកាលពីសប្តាហ៍មុនដោយសារការចម្រាញ់ និងតម្រូវការធ្លាក់ចុះ។

តម្លៃប្រេងឆៅក៏ស្ថិតនៅក្រោមសម្ពាធពីក្តីបារម្ភជុំវិញការបិទដំណើរការ​រដ្ឋាភិបាលអាមេរិក​ ការនាំចេញឡើងវិញ​នៃប្រេងពីតំបន់កួដរបស់អ៊ីរ៉ាក់ និងផែនការរបស់ប្រទេសអ្នកមានទាំង៧ (G7) ដើម្បី​រឹតបន្តឹងការអនុវត្តលើអ​តិថិជនទិញប្រេងរុស្ស៊ីជាដើម៕