សេដ្ឋកិច្ចវៀតណាម​កើនជាង ៨ % ត្រីមាសមុន ទោះរងពន្ធអាមេរិក

រដ្ឋាភិបាលវៀតណាមបាន​ឱ្យដឹង​កាលពីថ្ងៃអាទិត្យថា សេដ្ឋកិច្ចរបស់​វៀតណាម បានកើនឡើងក្នុងអត្រាប្រចាំឆ្នាំ ៨,២២ ភាគរយ នៅត្រីមាសទី៣ (កក្កដា-កញ្ញា) ទោះបីជា​រងនូវពន្ធ ២០ ភាគរយ របស់សហរដ្ឋអាមេរិក​ លើទំនិញនាំចេញទៅប្រទេសមហាអំណាចសេដ្ឋកិច្ចមួយនេះក្ដី។

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ អត្រាជាង ៨ ភាគរយ គឺខ្ពស់ជាងកំណើន ៧,៩៦ ភាគរយ ក្នុងត្រីមាសទី ២។

​រដ្ឋមន្ត្រីហិរញ្ញវត្ថុវៀតណាម លោក Nguyen Van Thang បាននិយាយ​ក្នុងសេចក្តីថ្លែងការណ៍របស់រដ្ឋាភិបាលថា៖ «វាគឺជាកំណើនប្រចាំត្រីមាសខ្ពស់បំផុត ចាប់តាំងពីឆ្នាំ ២០១១ ដោយមិនរាប់បញ្ចូល​កំណើន​ឆ្នាំ ២០២២ ​ដែល​សេដ្ឋកិច្ចស្ទុះងើបឡើងវិញពីវិបត្តិកូវីដ១៩»។​

ទំហំពាណិជ្ជកម្មសរុបរបស់វៀតណាម ដែលរាប់បញ្ចូលទាំងការនាំចូល និងការនាំចេញ បានកើនឡើងលើសពី ៦៨០ ​ប៊ីលានដុល្លារក្នុងរយៈពេល ៩ ខែ ដើម​ឆ្នាំ ដោយ​កើនឡើង ១៧ ភាគរយ ធៀប​នឹង​រយៈពេលដូចគ្នាឆ្នាំមុន។ ​រដ្ឋាភិបាល​បាន​ឱ្យដឹងថា វៀតណាម​បានទទួលនូវ​អតិរេកពាណិជ្ជកម្ម​ ១៦,៨ ប៊ីលាន​ដុល្លារ ក្នុងរយៈពេលដដែល។ ​

យ៉ាងណាមិញ របាយការណ៍សេដ្ឋកិច្ចកាលពីថ្ងៃអាទិត្យ មិន​បាន​​បង្ហាញ​ព័ត៌មាន​ពាណិជ្ជកម្ម​ជាលម្អិតភ្លាមៗទេ ​ខណៈអ្នកពាក់ព័ន្ធរងចាំមើលដើម្បីវិភាគពីផលប៉ះពាល់នៃពន្ធគយ ២០ ភាគរយ របស់អាមេរិក ដែលចូលជាធរមាន​នៅថ្ងៃទី ៧ សីហា​។ ការិយាល័យស្ថិតិជាតិគ្រោងចេញ​​ទិន្នន័យពាណិជ្ជកម្ម​លម្អិតថ្ងៃចន្ទនេះ។

នាយករដ្ឋមន្ត្រីវៀតណាម លោក​ ផាម មិញ ឈិញ​ ​បាននិយាយកាលពីខែមុនថា វៀតណាមរំពឹង​ពីកំណើន ១២ ភាគរយ នៃការនាំចេញឆ្នាំនេះ។ ប៉ុន្តែរបាយការណ៍កម្មវិធីអភិវឌ្ឍន៍អង្គការសហប្រជាជាតិ (UNDP) បាននិយាយថា ពន្ធរបស់អាមេរិក​អាចបង្កហានិភ័យនៃការធ្លាក់ចុះ ១/៥ នៃការនាំចេញរបស់ប្រទេស។​

បើតាមរបាយការណ៍ថ្ងៃអាទិត្យរបស់​រដ្ឋាភិបាល សេដ្ឋកិច្ចវៀតណាម​បាន​កើនឡើង ៧,,៨៤ ភាគរយ ក្នុងរយៈពេល ៩ ខែដើមឆ្នាំ ធៀប​នឹង​រយៈពេលដូចគ្នាឆ្នាំមុន។ ​

មែនទែនទៅ វៀតណាម​កំណត់គោលដៅកំណើន​សេដ្ឋកិច្ចចន្លោះពី ៨,៣-៨,៥ ភាគរយ ឆ្នាំនេះ ពោលគឺធំជាងកំណើន ៧,០៩ ភាគរយ កាលពីឆ្នាំមុន និងខ្ពស់ជាងការព្យាករ ៦,៦ ភាគរយ របស់ធនាគារពិភព​លោក និង ៦,៥ ភាគរយ របស់​មូលនិធិរូបិយវត្ថុអន្តរជាតិ​ (IMF)៕