ខេត្តបន្ទាយមានជ័យ រកឃើញអ្នកវិជ្ជមានកូវីដ-១៩ ៨៣នាក់ និងអ្នកជាសះស្បើយ ១៤៤នាក់

ខេត្តបន្ទាយមានជ័យ៖ យោងលទ្ធផលតេស្តរហ័ស និងមន្ទីរពិសោធន៍ជាតិភ្នំពេញបានឱ្យដឹងថា បានរកឃើញអ្នកវិជ្ជមានកូវីដ-១៩ ចំនួន ៨៣នាក់ នៅថ្ងៃទី១៨ កក្កដា ក្នុងនោះក៏មានអ្នកជាសះស្បើយអំពីជំងឺកូវីដ-១៩ មានចំនួន១៤៤នាក់។

នេះបើយោងសេចក្តីប្រកាសព័ត៌មានចុះ ថ្ងៃទី១៩ ខែកក្កដា ឆ្នាំ២០២១ របស់រដ្ឋបាលខេត្តបន្ទាយមានជ័យ ស្តីពីការរកឃើញវិជ្ជមានជំងឺកូវីដ-១៩ ក្នុងនោះភាគច្រើនកើត និងជាសះស្បើយនៅ ស្រុកព្រះនេត្រព្រះ ស្រុកម៉ាឡៃ ក្រុងប៉ោយប៉ែត និងក្រុងសិរីសោភ័ណ។

រដ្ឋបាលខេត្តសូមជម្រាបជូនបងប្អូនប្រជាពលរដ្ឋនិងសាធារណៈជនដែលបានប៉ះពាល់ដោយផ្ទាល់សូមរួសរាន់មកជួបក្រុមគ្រូពេទ្យនឹងធ្វើចត្តាឡីស័ក ដើម្បីយកសំណាកទៅពិនិត្យនិងអ្នកប៉ះពាល់ដោយប្រយោលជាមួយអ្នកវិជ្ជមានជំងឺកូវីដ-១៩ ទាំង៨៣ នាក់ខាងលើសូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនដោយមិនត្រូវពាក់ព័ន្ធនិងប៉ះពាល់ជាមួយអ្នកដទៃដាច់ខាត។

ក្នុងករណីមានការប្រែប្រួលសុខភាពមិនប្រក្រតីដូចជាឡើងកំដៅលើសពី៣៧អង្សាសេ ក្អក កណ្ដាស ហៀសំបោរឈឺបំពង់ក មានការថប់ដង្ហើមជាដើម ត្រូវប្រញាប់ទំនាក់ទំនងទៅក្រុមឆ្លើយតបបន្ទាន់នៃមន្ទីរសុខាភិបាលរដ្ឋបាលខេត្តឬមន្ទីរពេទ្យខេត្ត ក្រុងស្រុក ឬមណ្ឌលសុខភាព ឃុំស ង្កាត់ និងអាជ្ញាធរមូលដ្ឋានជាដើម៕

អត្ថបទ៖ វ៉ាន់ ណាង