ធនាគារបរទេស ២ ប្ដឹងជំទាស់ការលក់អគារតម្លៃរាប់លានដុល្លាររបស់អតីត​សេដ្ឋិនី វៀតណាម ដែលរងទោសប្រហារជីវិត

ធនាគារ HSBC និង OCBC Bank Singapore បាននិយាយថា ប្រធានក្រុមហ៊ុន Van Thinh Phat និងជាអតីតសេដ្ឋិនីវៀតណាមលោកស្រី Truong My Lan បានដាក់បញ្ចាំអគារ Capital Place សម្រាប់ប្រាក់កម្ចីសរុបចំនួន ២០០ លានដុល្លារនៅធនាគារទាំងពីរ បន្ទាប់ពីលោកស្រីត្រូវបានដកហូតសិទ្ធិលក់អចលនទ្រព្យ ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី៣០ ខែមីនាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឯសវនាការកាត់ក្ដីរបស់លោកស្រី Truong My Lan កាលពីថ្ងៃព្រហស្បតិ៍កន្លងទៅ តំណាងមកពីធនាគារធនាគារ HSBC និង OCBC Bank Singapore បានលើកឡើងថា ក្រុមហ៊ុន Twin-Peaks ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនអភិវឌ្ឍន៍អចលនទ្រព្យ Van Thinh Phat បានប្រើប្រាស់អចលនទ្រព្យនេះដើម្បីធានាប្រាក់កម្ចីពីធនាគារទាំងពីរ ហើយប្រាក់កម្ចីទាំងនេះមិនទាន់ត្រូវបានទូទាត់លាត់សើយនៅឡើយទេ ខណៈកាលបរិច្ឆេទសងវិញនឹងផុតនាថ្ងៃទី៣០ ខែមេសា ។

អ្នកតំណាងធនាគារ HSBC បានបញ្ជាក់បន្ថែមថា “លោកស្រី Truong My Lan មិនមានសិទ្ធិលក់អគារ Capital Place នោះទេ ដោយសារតែវាជាវត្ថុបញ្ចាំសម្រាប់ប្រាក់កម្ចី ខណៈកន្លងមក អតីតសេដ្ឋិនីវ័យ ៦៨ ឆ្នាំដែលរងការកាត់ទោសប្រហារជីវិតរូបនេះ ធ្លាប់បានស្នើសុំឲ្យកូនស្រីរបស់លោកស្រីឈ្មោះ Chu Duyet Phan ដាក់លក់អគារដែលមានទីតាំងនៅផ្លូវ Lieu Giai ក្នុងទីក្រុងហាណូយ ដើម្បីយកប្រាក់ទាំងនោះទៅសងធនាគារ Saigon Commercial Bank (SCB)” ។

លោកស្រី Truong My Lan បានប្រាប់តុលាការថា អគារនោះមានតម្លៃ ១ ពាន់លានដុល្លារ ប៉ុន្តែកាលពីពេលថ្មីៗនេះ កូនស្រីរបស់លោកស្រីបានជូនដំណឹងដល់តុលាការថា មានឈ្មួញម្នាក់ហ៊ានចំណាយលុយ ៣៦០ លានដុល្លារសម្រាប់ទិញអចលនទ្រព្យមួយនេះ ក្រោយពេលដែលអគារ Capital Place ត្រូវបានបញ្ចាំនៅធនាគារចំនួន ៤ ផ្សេងគ្នាក្នុងតម្លៃ ២៣០ លានដុល្លារ ខណៈប្រាក់ដែលនៅសល់ពីការបង់ធនាគារ នឹងត្រូវប្រគល់ឲ្យអាជ្ញាធរដើម្បីទូទាត់ឲ្យធនាគារ SCB ។

ទោះយ៉ាងណា អ្នកតំណាងរបស់ធនាគារ HSBC និង OCBC Bank Singapore បានដាក់ពាក្យប្តឹងទៅតុលាការលើបទចោទប្រកាន់ផ្តល់អាទិភាពដល់ការប្រើប្រាស់អគារដើម្បីទូទាត់លាត់សើយប្រាក់កម្ចីដែលកំពុងមានស្រាប់ ហើយអ្នកតំណាងធនាគារទាំងពីរថែមទាំងស្នើទៀតថា បន្ទាប់ពីអគារនេះត្រូវបានដាក់លក់ និងប្រាក់កម្ចីត្រូវបានទូទាត់រួចរាល់ហើយ មូលនិធិដែលនៅសល់គួរតែត្រូវបានផ្ទេរទៅឲ្យអាជ្ញាធរជំនួសវិញ មិនមែនប្រគល់ទៅឲ្យធនាការ SCB នោះឡើយ ។

គួរបញ្ជាក់ថា លោកស្រី Truong My Lan ​ប្រឈមមុខនឹងការកាត់ទោសប្រហារជីវិតពីបទចោទប្រកាន់ស៊ីសំណូកសូកប៉ាន់ និងបំពានបទប្បញ្ញត្តិធនាគារ ជាពិសេសគឺការកិបកេងបន្លំប្រាក់ពីធនាគារ SCB ចំនួន ៣០៤ ពាន់ពាន់លានដុង (១២.៣១ ពាន់លានដុល្លារ) ខណៈអង្គ​ជំនុំ​ជម្រះលើអតីតសេដ្ឋិនីរូបនេះបាន​ចាប់​ផ្តើមតាំងតែពី​ថ្ងៃ​ទី៥ ខែ​មីនាមកម្ល៉េះ ហើយ​គ្រោង​នឹង​បន្ត​រហូត​ដល់​ថ្ងៃ​ទី២៩ ខែ​មេសាឯណោះ ។

ទាក់ទងនឹងទំនួលខុសត្រូវរដ្ឋប្បវេណី រដ្ឋអាជ្ញាបានស្នើឲ្យគណៈវិនិច្ឆ័យបង្ខំចុងចោទ Truong My Lan សងសំណងដល់ធនាគារ SCB សម្រាប់ការខាតបង់សរុបចំនួន ៦៦៧,៧០០ ពាន់លានដុង (២៧ ពាន់លានដុល្លារ) និងការប្រាក់បន្ថែមពីលើតម្លៃតួលេខទឹកប្រាក់សរុប ហើយចាប់ពីឆ្នាំ ២០១២ ដល់ឆ្នាំ ២០២២ ក្រុមរបស់លោកស្រី Truong My Lan មានប្រាក់កម្ចីច្រើនជាង ២,៥០០ នៅធនាគារ SCB ជាមួយនឹងទឹកប្រាក់សរុបជាង ៤៤ ពាន់លានដុល្លារដែលស្មើនឹង ៩៣ ភាគរយនៃឥណទានសរុបដែលធនាគារបានចេញឲ្យ ៕

ដោយ ៖ សុខ ជីវ័ន្ត

ចុចអាន ៖ រុស្ស៊ី កាន់តែមានព័ស្តុតាង អ៊ុយក្រែន ជាប់ពាក់ព័ន្ធការវាយប្រហារភេរវកម្ម មិនអាចប្រកែកបាន