ឆន ស្រីណេត អួលដើមក”រឿងខ្មែរលែងស្គាល់ខ្មែរ” ព្រោះអ្នករស់នៅក្រោមការគ្រប់គ្រងថៃម្នាក់ បដិសេធការពិតទាំងបំពាន

បវរកញ្ញាកម្ពុជាក្រោម កញ្ញា ឆន ស្រីណេត និយាយទាំងអួលដើមក រឿងរ៉ាវដែលស្ត្រីចំណាស់ដើមកំណើតខ្មែរម្នាក់ លែងទទួលស្គាល់អត្តសញ្ញាណដូនតាខ្លួន ហើយថែមទាំងជេរប្រមាថកញ្ញា និងនិយាយការពារថៃទាំងបំពានក្តែងៗទៅវិញ។

ពិតណាស់ ជម្លោះព្រំដែនកម្ពុជា-ថៃក្នុងឆ្នាំ២០២៥ នេះ បានធ្វើឱ្យអ្នកមានឈាមជ័រជាខ្មែរ មិនថារស់នៅក្រោមការដឹកនាំគ្រប់គ្រងរបស់រដ្ឋាភិបាលអ្នកជិតខាង ឬកម្ពុជាឡើយ សុទ្ធតែភ្ញាក់ផ្អើលនូវទង្វើប្រមាថសាសន៍កំណើតរបស់អ្នកមួយចំនួនធំ ក្នុងខេត្តសុរិន្ទ និងខេត្តផ្សេងៗទៀត ដែលបដិសេធថាខ្លួនមិនមែនខ្មែរ ហើយចេញមុខគាំទ្រថៃដោយបើកចំហរ មិនថារឿងព្រំដែន ឬវប្បធម៌ឡើយ។ ខណៈមួយចំនួនទៀត បែរជាហ៊ានប្រកាសខ្លួនជាជនជាតិថៃ ដូនតាខ្លួនជា ខម ទាំងដែលពិភពលោកក៏ដឹងហើយថា «ខម» គឺខ្មែរ ជាខ្មែរដែលកំពុងរស់នៅលើទឹកដីកំណើតជាតិកម្ពុជានេះឯង។

យ៉ាងណា មើលឃើញនូវការស្អប់ខ្ពើមខ្មែរគ្នាឯងនេះ កញ្ញា ឆន ស្រីណេត នៅថ្ងៃទី១៤ តុលា ឆ្នាំ២០២៥ បានចេញមកនិយាយជារឿងរើសអើងខ្មែរជាថ្មី ដោយបញ្ជាក់ថា ខ្លួនពិតជាមានអារម្មណ៍ឈឺចាប់ខ្លាំង ព្រោះអាសូរជាតិសាសន៍ដ៏កម្សត់មួយនេះ ខណៈមិនត្រឹមតែត្រូវបានគេឈ្លានពានគ្រប់ជំនាន់ទេ ថែមទាំងគេបង្រៀនឱ្យខ្មែរស្អប់ខ្មែរថែមទៀត ដែលនេះ ពិតជាខុសប្លែកពីអ្នកកម្ពុជាក្រោមភាគច្រើន ដែលនៅតែប្រកាន់យកអត្តសញ្ញាណដូនតាយ៉ាងខ្ជាប់ខ្ជូន លើកលែងតែមួយចំនួនតូចប៉ុណ្ណោះ។

ជាក់ស្តែង ដ្បិតតែរស់នៅទឹកដីកម្ពុជាក្រោម ស្ថិតក្រោមការគ្រប់គ្រងរបស់វៀតណាមយូរយ៉ាងណាក៏ដោយ តែកញ្ញា ឆន ស្រីណែត តែងតែបង្ហាញអត្តសញ្ញាណដូនតាខ្លួនជាខ្មែរមិនអាចបំភ្លៃ ខុសពីខ្មែរដែលរស់នៅក្រោមការគ្រប់គ្រងរបស់ថៃយូរ បែរលែងទទួលស្គាល់ថាខ្លួនមានឈាមជ័រខ្មែរ។ សូមស្តាប់វីដេអូលម្អិត៖

គួររំលឹកថា ចាប់តាំងពីមើលឃើញអ្នកមានឈាមជ័រជាខ្មែរ រស់នៅលើទឹកដីខេត្តខ្មែរដែលថៃឈ្លានពានដណ្តើមកាន់កាប់ច្រើនជំនាន់ទៅហើយ មិនត្រឹមតែបំភ្លេចកំណើតដូនតា ថែមទាំងចូលរួមគាំទ្រថៃ ឈ្លានពានខ្មែរ និងឧបត្ថម្ភគាំទ្រយោធាថៃថែមទៀត។ ដោយហេតុនេះហើយ 1st Runner – Up Miss Universe Cambodia 2021 មកពីខេត្តព្រះត្រពាំងរូបនេះ តែងតែចេញសារក្រើនរំលឹកជាបន្តបន្ទាប់ ដាស់ស្មារតីខ្មែរលើមកវិញ បើទោះមិនបាននឹកឃើញដូនតា ក៏កុំហុចដងឱ្យចោរចាក់ខ្មែរ៕