ពេជ្រ សោភា ចេញមុខឆ្លើយតបក្រោយស្រ្តីម្នាក់រិះគន់

តារាចម្រៀងអ្នកនាង ពេជ្រ សោភា បានចេញមុខធ្វើការឆ្លើយតបភ្លាមៗ បន្ទាប់ពីត្រូវបានស្រ្តីម្នាក់រិះគន់រឿងដែលថា នាងតែងខ្លួនអត់សមពេលទៅចូលរួមកម្មវិធីធំទាំងមូលដោយគ្មានគ្រឿងពេជ្រពាក់នឹងគេ។

ការចេញមុខឆ្លើយតបរបស់អ្នកនាង ពេជ្រ សោភា នេះ គឺធ្វើឡើងក្រោយពេលដែលនាងបានបញ្ចេញរូបភាពជាច្រើនសន្លឹកលើបណ្ដាញសង្គមហ្វេសប៊ុក គ្រាដែលតុបតែងខ្លួនយ៉ាងស្រស់ស្អាតចូលរួមកម្មវិធីមង្គលការដ៏ធំកូនប្រុសច្បងរបស់អ្នកនាង គង់ សុជាតិ កាលពីថ្មីៗកន្លងទៅ។ ខណ:មានអ្នកគាំទ្រមួយចំនួនបានសរសើរថា នាងស្អាតគ្រប់គ្នា។

ដោយឡែកស្របពេលជាមួយគ្នានេះដែរក៏ស្រាប់តែគេឃើញស្រ្តីម្នាក់បានចេញមករិះគន់លើតារាចម្រៀងស្រីរូបនេះថាការតុបតែងខ្លួនរបស់អ្នកនាង ពេជ្រ សោភា ដែលទៅចូលរួមក្នុងកម្មវិធីមង្គលការនោះ គឺមើលទៅហាក់អត់សូវសមព្រោះអត់ឃើញនាងពាក់គ្រឿងអលង្ការ ឬគ្រឿងពេជ្រដូចគេផ្សេងៗទៀតទេ ។

ឆ្លើយតបការរិះគន់នេះ អ្នកនាង ពេជ្រ សោភា ក៏បានសរសេររៀបរាប់បែបនេះថា «ផ្ញើជូនបងស្រីម្នាក់នោះជាពិសេស,បងនិយាយថា ពេជ្រ សោភា ទៅការគេទាំងមូលធ្វើខ្លួនចេញមកដូចអត់សមសោះ ថ្ងៃក្រោយបើគ្មានរបស់ពាក់មកខ្ចីខ្ញុំពាក់ទៅ បើក្រដឹងថាក្រចាញ់គេពាក់ពេជ្រពេញៗខ្លួន។ (បងអើយខ្ញុំពាក់ពេជ្រតាំងពីថ្ងៃដែលខ្ញុំកើតរហូតដល់ថ្ងៃនេះ គឺពេជ្រ សោភា) មួយទៀតបងឯងកើតអីមកខឹងនឹងខ្ញុំមិនពាក់ពេជ្រនឹងបង»៕

អត្ថបទ៖ ចាន់រ៉ា