ជីវិតកម្សាន្ដ

ឯម រៀម សុំទោសមហាជន និងសន្យាមិនធ្វើឲ្យប៉ះពាល់ដល់សង្គមទៀតទេ

បានផុស

២ years មុន

នៅ

ថ្ងៃអង្គារ ១១ មេសា ២០២៣

ដោយ

បន្ទាប់ពីរងព្រនង់រិះគន់ដោយមិនសំចៃមាត់ពីមហាជនខ្មែរទូទាំងប្រទេសចំពោះកំហុសឆ្គងរបស់ខ្លួនដែលបានបង្ហោះខ្លឹមសារពាក់ព័ន្ធ”បេះដូងក្រដាស ១ លាន” នៅមុខប្រាសាទខេត្តសៀមរាបនោះ ពេលនេះលោក ឯម រៀម បានចេញមុខសុំទោសមហាជនជាសាធារណៈនូវរាល់កំហុសឆ្គងរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្លឹមសារដែលអ្នកច្នៃម៉ូដលោក ឯម រៀម បានសរសេរសុំទោសមហាជនបានលើកឡើងថា «សូមអភ័យទោសពីបងប្អូន ន័យដែលខ្ញុំបានសរសេរ Caption ខុសអត្ថន័យរបស់ ១ លានបេះដូងកាត់បត់កាលម្សិលមិញ ហើយខ្ញុំក៏បានកែសម្រួលរួច Caption ឡើងវិញហើយ។ ដូចនេះហើយសូមខន្តី និងអភ័យផង ដោយខ្ញុំមិនបានពិចារណា ហើយពីពេលនេះទៅសន្យាថា នឹងធ្វើសិល្បៈរបស់ខ្ញុំ និងមិនប៉ះពាល់ដល់សង្គមឡើយ»។

សូមជម្រាបថា ការសុំទោសរបស់លោក ឯម រៀម នេះ ធ្វើឡើងបន្ទាប់ពីត្រូវបានមហាជនផ្ទុះការរិះគន់ជាថ្មីកក្រើកបណ្ដាញសង្គមហ្វេសប៊ុក កាលពីថ្ងៃទី ១០ ខែមេសា ឆ្នាំ ២០២៣ ក្រោយអ្នកច្នៃម៉ូដរូបនេះបានធ្វើការបង្ហោះខ្លឹមសារពាក់ព័ន្ធការរៀបចំដាក់តាំងលម្អបេះដូងក្រដាស ១ លានបេះដូង នៅទឹកដីខេត្តសៀមរាប ក្នុងន័យធ្វើឲ្យប៉ះពាល់យ៉ាងខ្លាំងដល់បេះដូងមហាជន។

ខ្លឹមសារលោក ឯម រៀម បញ្ចេញនៅលើបណ្ដាញសង្គមហ្វេសប៊ុកដែលនាំឲ្យផ្ទុះការមិនពេញចិត្ត និងរិះគន់កើតឡើងដូចទឹកបាក់ទំនប់ដោយសារតែលោកលើកឡើងថា “១ លានបេះដូងក្លែងក្លាយ បើជាថវិការដ្ឋ សូមចូលរួមសោកស្ដាយណាស់”។ ក្រោយមកទៀតលោក ឯម រៀម ប្ដូរខ្លឹមសារវិញថា “១ លានបេះដូងក្លែងក្លាយ បើជាថវិការដ្ឋ សូមចូលរួមសោកស្ដាយ តែបើជាទឹកចិត្តរបស់បងប្អូន មិនគួរធ្វើនៅទីនេះ”។ ចំណែកខ្លឹមសារបន្ទាប់ លោក ឯម រៀម និយាយថា ១ លានបេះដូងចម្រុះពណ៌៕

អត្ថបទ ៖ ចាន់រ៉ា