ជីវិតកម្សាន្ដ

ឯម រៀម ស្នើឱ្យមហាជនចូលរួមគាំទ្រសិប្បកម្ម ឬហត្ថកម្មខ្មែរ

បានផុស

៩ ខែ មុន

នៅ

ថ្ងៃព្រហស្បតិ៍ ១១ កក្កដា ២០២៤

ដោយ

លោក ឯម រៀម ដែលមហាជនស្គាល់គ្រប់គ្នាថា ជាអ្នកច្នៃម៉ូដល្បីឈ្មោះបានចេញមុខមកស្នើដល់មហាជនចូលរួមគាំទ្រសិប្បកម្ម ឬហត្ថកម្មខ្មែរ ក្រោយរងការរិះគន់ជាថ្មីដែលយកក្រណាត់ជូតជើងច្នៃម៉ូដសំលៀកបំពាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពិតលោក ឯម រៀម ថ្មីៗនេះបានបង្ហោះរូបភាពដោយភ្ជាប់ជាមួយការច្នៃនូវក្រណាត់ជូនជើងធ្វើជាសំលៀកបំពាក់ ខណៈមានមតិមួយចំនួនបានផ្ទុះការវែកញែកដោយខ្លះគាំទ្រ និងខ្លះទៀតបានរិះគន់យ៉ាងចាស់ដៃទៅលើ ឯម រៀម ផងដែរ។

ដើម្បីជាការឆ្លើយតប លោក ឯម រៀម បាននិយាយថា«ផ្ញើជូនអ្នកថ្លៃថ្នូរដែលដឹងគ្រប់រឿង ចេះគ្រប់រឿង រៀនគិតវិជ្ជមានខ្លះផងសូមចូលរួមថែរក្សាសិប្បកម្ម ឬហត្ថកម្មខ្មែរ បើផ្ទះ១ មានកំរាល១ គឺ អាចជួយសម្រួលជីវភាពរបស់ពួកគាត់ និងជួយលើកកំពស់ផលិតផលក្នុងស្រុក បើម្នាក់ៗប្រើប្រាស់កំរាលនាំចូលមិនយូទេសិប្បកម្ម ឬហត្ថកម្មខ្មែរនឹងត្រូវបាត់បង់»។

ដោយឡែក ក៏មានការបញ្ចេញមតិពីអ្នកគាំទ្រលោក ឯម រៀម ដែរថា ពេលខ្លះ ឯម រៀម ( EM Riem )គឺជាមនុស្សអស្ចារ្យ ទោះបីគាត់ធ្លាប់មានការច្នៃសំលៀកបំពាក់ឆ្គាំឆ្គងខ្លះព្រោះគាត់គិតថា ជាសិល្បៈ តែជាក់ស្តែងវាប៉ះពាល់វប្បធម៌ ឬអ្នកបុរាណនិយម។

ប្រភពបានបន្ថែមថា របស់ខ្លះគាត់យកមកបង្ហាញវាជាផ្នែកមួយនៃការផ្សព្វផ្សាយ និងជួយគាំទ្រដល់ជីវភាពអ្នកលក់ក្រណាត់ជូតជើងដែលធ្វើដោយដៃ ថែមទាំងមានតម្លៃថោកទៀតផង ។ លើកនេះគាត់អត់ឆ្កួតទេតែជាចេតនាល្អមួយក្នុងការលើកស្ទួយក្រណាត់ជូតជើងផលិតផលក្នុងស្រុករបស់ប្រជាជនខ្មែរ៕

អត្ថបទ៖ ចាន់រ៉ា