ឯម រៀម បញ្ជាក់ថា ទេពកោសល្យច្នៃម៉ូដ បានហាត់រៀនចំណេះជំនាញនៅសាលារចនា និងវិចិត្រសិល្បៈ

បន្ទាប់ពី​រង​ការ​រិះគន់ និងត្រូវ​បាន​សមាគម​សិល្បករ​ខ្មែរ​បាន​កោះ​ហៅ​ទៅ​ពិភាក្សា និង​សួរនាំជុំវិញ​ការច្នៃម៉ូដ​សំលៀកបំពាក់​​មិន​សមរម្យ​ទៅ​ចូលរួម​កម្មវិធីធំមួយកាលពីថ្មីៗកន្លងទៅនេះ​លោក ឯម រៀម បាន​​ទទួល​យក​ការរិះគន់​របស់​មហាជន និង​សន្យា​អនុវត្ត​​​តាម​ការ​ណែនាំ​របស់​ប្រធាន​សមាគម​សិល្បៈ​ករ​ខ្មែរ។

ជា​ការ​ពិត​​អ្នក​ច្នៃម៉ូដ​ល្បីឈ្មោះ​លោក ឯម រៀម កន្លង​មក​បាន​រង​ការ​រិះគន់​យ៉ាង​ចាស់ដៃ​ពីសំណាក់​មហាជន​ព្រម​ទាំង​អ្នក​ប្រើប្រាស់​បណ្តាញ​សង្គម​ហ្វេសប៊ុក​​បន្ទាប់​ពីលោក​បាន​តុបតែង​ខ្លួនប្លែក​ដោយ​ការ​ច្នៃ​គ្រឿង​អេឡិចត្រូនិច(រាជនីAI)​ ទៅចូលរួមកម្មវិធីសម្ភោធ MV បទ “ទេវរាជ” របស់​តារា​ចម្រៀង ទេព បូព្រឹក្ស។

ដោយឡែក ក្រោយ​​ពី​ទទួល​​បាន​ការ​ណែ​​នាំ​ពី​សមាគមសិល្បករ​ខ្មែរ លោក ឯម រៀម បាន​ចេញ​មក​បញ្ជាក់​ទៅកាន់​អ្នកគាំទ្រ និង​ទស្សនិកជន​ថា ចំពោះ​ទេពកោសល្យ​ច្នៃ​ម៉ូដ​របស់​លោក​គឺបាន​ចូលហាត់​រៀនចំណេះ​ជំនាញ​ពី​លោកគ្រូ​អ្នកគ្រូ​នៅ​សាលា​​ចរនា និង​វិចិត្រ​សិល្បៈ​បានយ៉ាងត្រឹមត្រូវ។

លោកនិយាយថា «Facebook ឯម រៀម មិន​មាន Admin នៅក្រៅ​ប្រទេស​ដូចអ្នក MMO ទេ ​ខ្ញុំបង្កើត Facebookមិនដើម្បី​ចង់​បាន​លុយ ពី Facebook គឺ​ចង់ចែករំលែក​វិស័យ​ច្នៃម៉ូដ​ទៅដល់បងប្អូន​ដែល​ស្រឡាញ់ និងចូលចិត្តវិស័យ​នេះហើយ​ក៏​មិនចាំ​បាច់​បំបុក​លុយ​ឱ្យFacebook Page ផ្សេងទៀត​ជួយផ្សព្វផ្សាយដើម្បីតែចង់ល្បី»។

ឯម រៀម លើកឡើងទៀតថា “មហាជនស្គាល់ EM RI EM ដោយ​សារ​ទេពកោសល្យ​នៃ​សិល្បៈ ត្រូវចាំ​ថា ឯម រៀម ជាអ្នក Graphic Design ដែល​បាន​ហាត់រៀន​ចំណេះជំនាញ​ពីលោកគ្រូ អ្នកគ្រូ​នៅ​សាលាចរនា និងវិចិត្រសិល្ប:”។

គួររម្លឹកថា ​កន្លងមក ឯម រៀម ធ្លាប់​រង​ការ​រិះយ៉ាង​ចាស់ដៃ​ជាច្រើន​ដង​មក​ហើយ និង​ក៏ត្រូវ​បាន​​​ក្រសួងវប្បធម៌ និងវិចិត្រសិល្បៈ​ចេញវិធាន​​ការ​ក្តៅ​ព្រមាន​ផងដែរក្រោយ​បង្ហោះ​រូបភាព​ស្រើបស្រាល​ ស្រាល​ននលគល​នៅ​លើបណ្តាញ​សង្គម​បណ្តាល​ឱ្យប៉ះពាល់​ដល់​វប្បធម៌ ប្រពៃណី និង​សេចក្ដី​ថ្លៃថ្នូរ​របស់​សង្គម​ជាតិ​យ៉ាង​ធ្ងន់ធ្ងរ៕

អត្ថបទ៖ ចាន់រ៉ា