អ្នកគាំទ្រអរគុណ Richie Jen ដែលជួយជីវិតនាងកាលពី ២២ ឆ្នាំមុន (មានវីដេអូ)

កាលពីថ្ងៃអាទិត្យ ទី២៨ ខែឧសភា កន្លងផុតទៅ មានវីដេអូនារីម្នាក់និយាយអំពីតារាចម្រៀង Richie Jen បង្ហោះតាមបណ្ដាញសង្គម Weibo ធ្វើឲ្យផ្អើលប្រទេសចិន ជាពិសេសយំសឹងគ្រប់ៗគ្នា ។

អំឡុងពេលសំណូមពរបទចម្រៀងក្នុងការប្រគំតន្ត្រីរបស់ Richie Jen នៅទីក្រុង Shenyang នារីពាក់ស្លឹកត្រចៀកទន្សាយម្នាក់ឡើងនិយាយទាំងក្ដុកក្ដួលថា “ខ្ញុំមានអាយុ ២៣ ឆ្នាំ ប៉ុន្តែខ្ញុំស្គាល់លោកអស់រយៈពេល ២២ ឆ្នាំមកម្ល៉េះ ហើយលោកក៏ធ្លាប់ពខ្ញុំកាលពីក្មេងដែរ” ខណៈកាន់រូបថត Richie កំពុងពនាង នារីនោះបន្តទៀតថា “ខ្ញុំមានជំងឺបេះដូងតាំងពីអាយុជាង ១ ខួប ហើយក្រុមគ្រួសារមិនអាចសង្គ្រោះជីវិតខ្ញុំបានទេព្រោះមិនមានថវិកាគ្រប់គ្រាន់ ។ លោកដឹងពីបញ្ហានេះ ពេលនៅតាមផ្លូវទៅប្រគំតន្ត្រីនៅទីក្រុង Shenyang ស្រាប់តែលោកបានបរិច្ចាគប្រាក់ ៣ ម៉ឺនយ័នសម្រាប់ការវះកាត់របស់ខ្ញុំ” ។

និយាយចប់ភ្លាម មហាជននាំគ្នាស្រែកហ៊ោយ៉ាងសប្បាយរីករាយ ចំណែកតារាចម្រៀងតៃវ៉ាន់វ័យ ៥៦ ឆ្នាំខាងលើបានឆ្លើយតបទៅនាងថា “អ្នកពេញវ័យហើយ” ។ ចុងក្រោយនារីវ័យក្មេងនោះបានសំណូមពរបទចម្រៀងតាំងពីឆ្នាំ ១៩៨៨ គឺ “កុំផ្លាស់ប្ដូរ (Don’t Change)” នាងសង្ឃឹមថាក្ដីស្រលាញ់រវាងពួកគេ និងក្នុងពិភពលោកនេះមិនផ្លាស់ប្ដូរជារៀងរហូត ៕

ប្រែសម្រួល ៖ វារី

ចុចអាន ៖ តារាល្បីលំដាប់ពិភពលោក  ៥ ដួង ធ្លាប់ត្រូវអ្នកគាំទ្រប្ដឹង