អេមមី បំផុសអ្នកគាំទ្រធ្វើបុណ្យជាមួយ « ព្រះរស់» សាងអំពើល្អដាក់ទានជួយអ្នកខ្វះខាត

ម្ចាស់បទ «អូនអ៊ូកគួរឱ្យស្រលាញ់» អ្នកនាង អេមមី ថ្វីត្បិតពេលនេះ នាង ឃ្លាតឆ្ងាយពីអាជីពសិល្ប:មួយរយ:ធំហើយក្តីអតីតតារាចម្រៀងស្រីរូបនេះ នៅតែបង្ហាញការនឹករលឹកដល់អ្នកគាំទ្រ ពិសេសចង់វិលរកវិថីសិល្ប:ដូចគ្រាមុនវិញប្រសិនមានឱកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ងាកមកចាប់អារម្មណ៍ខ្លឹមសាររបស់ អេមមី ពីក្រៅប្រទេសនាងបានបំផុតដល់មហាជនឱ្យធ្វើបុណ្យជាមួយ «ព្រះរស់» បានច្រើន និងសាងអំពើល្អដាក់ទានជួយអ្នកខ្វះខាតទើបជីវិតមានសេចក្តីសុខ។ នាងចាត់ទុកថាការធ្វើបុណ្យសាងអំពើល្អជារឿងដ៏សំខាន់សម្រាប់មនុស្សគ្រប់គ្នា ហើយក៏ជាទង្វើល្អសម្រាប់សង្គមជាតិទៀតផង។

អ្នកមេម៉ាយចាយសម្រស់ អេមមី បាននិយាយថា «ចង់ឱ្យអាយុវែងត្រូវចេះធ្វើបុណ្យ សាងអំពើល្អឱ្យបានច្រើន ជាពិសេសគឺធ្វើបុណ្យជាមួយនឹង (ព្រះរស់) ទោះបីជាលិចលង់ ក៏គង់តែអណ្ដែតឡើងមកវិញ ចង់ឱ្យមានទ្រព្យមានសំណាងត្រូវចេះធ្វើទាន ការជួយមនុស្សដែលខ្វះខាតគឺជារឿងល្អណាស់ ទោះគ្មានអី្វជួយគេ ត្រឹមគិតល្អ ធ្វើល្អដោយចិត្តស្មោះ ក៏គ្រប់គ្រាន់»។

គេចាំថាអតីតតារាចម្រៀងផលិតកម្មអ៊ឹម (M) អ្នកនាង អេមមី បានឃ្លាតឆ្ងាយពីសិល្ប:មានរយ:ពេលច្រើនឆ្នាំមកហើយបន្ទាប់ពីតារាស្រីរូបនេះសាងកេរ្តិ៍ឈ្មោះល្បី និងប្រជាប្រិយភាពមួយសន្ទុះធំ។ អេមមី ត្រូវបានអ្នកគាំទ្រ ពិសេសមិត្តៗយុវវ័យស្គាល់ច្រើន តាមរយ:បទ “អូនអ៊ូកគួរឱ្យស្រលាញ់”។

ជាការពិត អ្នកនាង អេមមី គឺជាអតីតតារាចម្រៀងស្រីល្បីឈ្មោះកាលពីអំឡុង ៥ ទៅ ៦ ឆ្នាំមុន ខណ:បទចម្រៀងរបស់នាងមួយចំនួនទទួលបានការគាំទ្រយ៉ាងច្រើនក្រាស់ក្រែលពីសំណាក់មហាជន ជាពិសេសស្រទាប់មិត្តៗយុវវ័យតែម្តង។ ប៉ុន្តែក្រោយមក នាង ក៏ឈប់ពីអាជីពមួយនេះចេញទៅរស់នៅទឹកដីប្រទេសអូស្រ្តាលី និងបានបើកមុខជំនួញរកស៊ីនៅទីនោះយ៉ាងកក់ក្តៅជាមួយកូនប្រុសជាទីស្រលាញ់៕

អត្ថបទ ៖ ចាន់រ៉ា