អេមមី ប៊ិះសន្លប់ក្រោយឆាក ធ្វើឱ្យ ខាន់ ជេមស៌ ពោលសរសើរកូនស្រីព្រោះទំនួលខុសត្រូវខ្ពស់នឹងការងារ

តារាចម្រៀងវ័យក្មេងកញ្ញា អេមមី ដែលជាកូនស្រីច្បងរបស់តារាចម្រៀងលោក ខាន់ ជេមស៌ ថ្មីៗនេះបានធ្វើឱ្យអ្នកគាំទ្រមានការភ្ញាក់ផ្អើល បន្ទាប់ពីឃើញមានការចែករំលែកវីដេអូចុះពីលើឆាកតន្ត្រី ក៏ស្រាប់តែមានអាការ:មិនស្រួលខ្លួននៅក្រោយឆាក។ យ៉ាងណា ស្ថានភាពសុខភាពរបស់តារាចម្រៀងវ័យក្មេងរូបនេះ មិនបានធ្វើឱ្យនាងមានគ្រោះថ្នាក់អ្វីនោះឡើយ ដោយមានក្រុមការងារជួយ។

ដោយឡែកតារាចម្រៀងចាស់វស្សាលោក ខាន់ ជេមស៌ ក្នុងនាមជាឪពុកក៏បានបង្ហាញនូវមោទនភាពចំពោះកូនស្រីដែលខំប្រឹងនឹងមានទំនួលខុសត្រូវខ្ពស់រហូតចប់កម្មវិធី។

លោក ជេមស៌ បាននិយាយថា “កូនស្រីខ្ញុំគំរូនៃភាពអត់ធ្មត់ និងការទទួលខុសត្រូវ ក្នុងនាមជាឪពុកខ្ញុំពិតជាមានមោទនភាពចំពោះកូនស្រីដែលមានភាពអត់ធ្មត់ និងទទួលខុសត្រូវខ្ពស់ទោះបីឈឺខ្លួនយ៉ាងណាក៏ដោយ នាងមិនដែលបោះបង់ការងារឡើយរហូតដល់បញ្ចប់ការងារស្អាតបាត ទើបនាងបញ្ចេញអាការៈឈឺរបស់នាង”។

តារាចម្រៀងលោក ខាន់ ជេមស៌ បាននិយាយបន្តថាដើមទុនចិត្តនៃការលះបង់ភាពអត់ធ្មត់ និងការប្តេជ្ញាចិត្តរបស់នាងគឺជាមេរៀនមួយដ៏មានតម្លៃសម្រាប់យើងទាំងអស់គ្នា។ ពេលខ្លះការខិតខំនិងភាពស្មោះត្រង់ចំពោះការងារអាចធ្វើឱ្យយើងមើលរំលងសុខភាពផ្ទាល់ខ្លួន។

តារាចម្រៀងលោក ខាន់ ជេមស៌ បានអំពាវនាវដល់ម ហាជនអ្នកគាំទ្រដែរថា សូមអ្នកទាំងអស់គ្នាយកចិត្តទុកដាក់ចំពោះសុខភាពរបស់ខ្លួនផង កុំរង់ចាំរហូតដល់ឈឺធ្ងន់ពេក។ សុខភាព គឺជាទ្រព្យដ៏មានតម្លៃបំផុតក្នុងជីវិត។ ជួយគ្នានេះក៏មានអ្នកគាំទ្រកញ្ញា អេមមី បានលើកទឹកចិត្តនិងជួនពរនាងផងដែរ៕ អត្ថបទ៖ ចាន់រ៉ា