ម្តាយ ជូរី ល្អហួស នាំកូនចែកទានចាស់ៗ និងពលរដ្ឋខ្វះខាត ៥០០គ្រួសារ ក្នុងថ្ងៃខួបកំណើត

ម្តាយបវរកញ្ញ ជូរី ល្អហួស គឺអតីតតារាសម្តែង ដេននីក្វាន់ ថ្វីត្បិតបាត់វត្តមានពីការងារសិល្ប: អំឡុងពេលមួយរយ:ចុងក្រោយនេះស្ទើរទាំងស្រុងពិតមែន ក៏អ្នកនាងនៅតែទទួលបានការគាំទ្រពីមហាជន តាមរយ:សកម្មភាពមនុស្សធម៌ជួយសង្គមជាដើម។

ជាក់ស្តែងនៅក្នុងថ្ងៃខួបកំណើតរបស់ខ្លួន អ្នកនាង ដេននី ក្វាន់ បានប្រកាសចែករំលែកក្តីស្រលាញ់តាមរយ:ការចែកទានដល់លោកតាលោកយាយ និងប្រជាពលរដ្ឋជួបការខ្វះខាតចំនួន ៥០០គ្រួសារ ដែលមានដូចជា អង្ករ, ក្រមា, សារុង និងថវិកាជាដើម។

អ្នកនាង ដេននី ក្វាន់ បានបញ្ជាក់ថា “ត្រៀមសម្រាប់ចែកទានជូនលោកយាយលោកតា និងអ៊ុំពូមីង គម្រោងដំបូងថាចំនួន ៣០០គ្រួសារ ឥឡូវឡើងដល់ ៥០០គ្រួសារ នាងខ្ញុំយកថ្ងៃ Birthday ទៅជាថ្ងៃចែកទានមានអារម្មណ៍ថាជ្រះថ្លាក្នុងចិត្តណាស់ អំពើល្អមិនសាបសូន្យ”។

តាមរយ:សកម្មភាពមនុស្សធម៌នេះដែរ អ្នកនាង ដេននី ក្វាន់ កំពុងតែទទួលបានការគាំទ្រពីសំណាក់មហាជន និងអ្នកគាំទ្រជាច្រើន ដែលនាងបានបង្វែរពីការជប់លៀងជួបជុំសប្បាយថ្ងៃខួបកំណើតមកធ្វើការចែក រំលែកក្តីស្រលាញ់ (អំណោយ) ជូនដល់ចាស់ៗ និងប្រជាពលរដ្ឋជួបការខ្វះខាត។

ប្រាកដណាស់តារាស្រី ដេននី ក្វាន់ មួយរយៈពេលចុងក្រោយនេះ ត្រូវបានទស្ស​និកជននិងអ្នកគាំទ្រកត់សម្គាល់ឃើញថា សម្រាប់អាជីពសិល្បៈរបស់អ្នកនាង បានបាត់ទាំងស្រុងដោយសារតារាស្រីរូបនេះ យកពេលទាំងនោះទៅបង្កើនមុខជំនួញរកស៊ីផ្ទាល់ខ្លួនយ៉ាងពេញដៃ។ ថ្វីត្បិតតែអតីតតារាសម្តែងមានដើមកំណើតមកពីទឹកដីខេត្តព្រះវិហារ ដេននី ក្វាន់ មានភាពឃ្លា​តឆ្ងាយពីវិស័យសិល្បៈក៏ពិតមែន ប៉ុន្តែបើសង្កេតពីមុខជំនួញរបស់អ្នកនាងឯណោះវិ​ញ គឺកា​ន់តែមានភាពរីកចម្រើនខ្លាំង៕ អត្ថបទ៖ ចាន់រ៉ា