ក្រសួងវប្បធម៌ ផ្តល់សិទ្ធិឱ្យភរិយាលោក កែវ ឯម គ្រប់គ្រងស្នាដៃនិពន្ធលោកត្រឹម១៩បទ លើសំណើសុំ ៤២បទ

ជាថ្មីម្តងទៀតក្រសួងវប្បធម៌និងវិចិត្រសិល្បៈបានសម្រេចនិងអនុញ្ញាតឲ្យលោកស្រី សូ សាវឿនគឺ មានសិទ្ធិគ្រប់គ្រងត្រឹមតែ ១៩បទលើសំណើស្នើ សុំចំនួន៤២បទរបស់អ្នកនិពន្ធលោក កែវ ឯម ដែលជាស្វាមីរបស់លោកស្រីប៉ុណ្ណោះ។

បើផ្អែកតាមការជូនដំណឹងរបស់ក្រសួងវប្បធម៌ និងវិចិត្រសិល្បៈចុះថ្ងៃទី៣០ ខែមិថុនា ឆ្នាំ២០២៥ បានឲ្យដឹងថា កន្លងទៅក្រសួងបានចេញសេចក្តីជូនដំណឹងលេខ០៣ សជណ ចុះថ្ងៃទី២៣ ខែមករា ឆ្នាំ២០២៥ ទាក់ទងនឹងសំណើរបស់លោកស្រី សូ សាវឿន ក្នុងការស្នើសុំសិទ្ធិគ្រប់គ្រងបទចម្រៀងចំនួន ៤២បទ ដែលជាស្នាដៃនិពន្ធរបស់ស្វាមីលោកស្រីគឺលោក កែវ ឯម ។

ក្រសួងវប្បធម៌ និងវិចិត្រសិល្ប: បានបញ្ជាក់ថា ក្រោយពីបានទទួលធាតុចូលក៏ដូចជាភស្តុតាងបន្ថែមពីសាធារណជន និងអ្នកជំនាញតូរ្យតន្ត្រី ក្រសួងបានពិនិត្យឡើងវិញ ហើយជាលទ្ធផលគឺលទ្ធភាពដែលក្រសួងអាចអនុញ្ញាតជូនលោកស្រី សូ សាវឿន បានមានត្រឹមតែ១៩ បទប៉ុណ្ណោះ លើសំណើស្នើសុំទាំងអស់ចំនួន ៤២បទ ដូចមានភ្ជាប់ជូននូវបញ្ជីបទចម្រៀងក្នុងឧបសម្ព័ន្ធនៃសេចក្តីជូនដំណឹងនេះ។

ជាមួយគ្នានេះដែរ ក្រសួងវប្បធម៌ និងវិចិត្រសិល្ប: រង់ចាំទទួលនូវមតិយោបល់ ឬភស្តុតាងពីសាធារណជន អ្នកជំនាញតូរ្យតន្ត្រី ឬរាល់ភាគីពាក់ព័ន្ធទាំងអស់ ដែលមានបំណងជំទាស់នឹងសំណើរបស់លោកស្រី សូ សាវឿន ខាងលើនេះគឺអាចតាមរយៈលិខិតជាលាយលក្ខណ៍អក្សរ ដោយភ្ជាប់មកជាមួយនូវភស្តុតាងរឹងមាំរួចបញ្ជូនមកក្រសួងវប្បធម៌និងវិចិត្រសិល្បៈ ដែលមានអាសយដ្ឋានលេខ២២៧ មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដើម្បីក្រសួងពិនិត្យលើករណីនៃការជំទាស់សារជាថ្មី។

ក្រសួងបានលើកឡើងទៀតថា ការដាក់ពាក្យស្នើសុំជំទាស់លើករណីនេះ មានរយៈពេលមួយខែ គិតចាប់ពីថ្ងៃជូនដំណឹងនេះតទៅ៕ ចាន់រ៉ា