អុឹម ជីវ៉ា ប្រកាសដឹកនាំសិល្បករល្បីៗ ជួយផ្សព្វផ្សាយផលិតផលខ្មែរ ដោយឥតគិតថ្លៃ

ក្នុងស្មារតីខ្មែរតែមួយរួមគ្នាជាធ្លុងតែមួយតារាសម្តែងលោក អុឹម ជីវ៉ា បានចេញមុខប្រកាសឆន្ទ:ដោយបញ្ជាក់ច្បាស់ៗថា លោកនឹងដឹកនាំសិល្បករល្បីៗជួយផ្សព្វផ្សាយផលិតផលស្នាដៃកូនខ្មែរ ដោយឥតគិតថ្លៃ។

ការចេញមុខប្រកាសស្ម័គ្រចិត្តជួយផ្សព្វផ្សាយផលិតផលរបស់ខ្មែរគ្រប់ប្រភេទដោយឥគិតថ្លៃពីសំណាក់លោក អុឹម ជីវ៉ា នាពេលនេះ បានធ្វើឱ្យមហាជនអ្នកគាំទ្រ និងកសិករខ្មែរ ពិសេសពលរដ្ឋខ្មែរបានបង្ហាញការគាំទ្រជាខ្លាំង ដែលនេះចាត់ទុកថាធ្វើឡើងក្នុងគោលបំណងបំផុសមហាជនចូលគាំទ្រផលិតខ្មែរដើម្បីប្រជាជនខ្មែរ។

លោក អុឹម ជីវ៉ា បានឱ្យដឹងថា “ខ្ញុំបាទសូមប្រកាស ខ្ញុំនឹងដឹកនាំសិល្បករតារាល្បីៗរបស់កម្ពុជា ដើម្បីជួយផ្សព្វផ្សាយផលិតផលដែលជាស្នាដៃកូនខ្មែរដោយឥតគិតថ្លៃ បើក្រុមហ៊ុនខ្មែរណាចង់ផ្សព្វផ្សាយសូមឆាតមកខ្មែរជួយខ្មែរ”។

ក្នុងគោលបំណងនេះដែរ កន្លងមកលោក អុឹម ជីវ៉ា ក៏ធ្លាប់បានធ្វើការអំពាវនាវដល់មហាជន និង អ្នកគាំទ្រ ពិសេសប្រជាពលរដ្ឋខ្មែរទាំងអស់ត្រូវរួមគ្នាថែរក្សា និងគាំទ្រផលិតផលក្នុងស្រុកដែលជាអត្តសញ្ញាណជាតិ ខ្មែរបង្កើតឡើងដោយស្នាដៃកូនខ្មែរ។ នេះជាការបង្ហាញនូវឆន្ទ:ក្នុងការលើកកម្ពស់ផលិតផលខ្មែរនិងក៏ជាចូលរួមការលើកទឹកចិត្តចំពោះប្រជាពលរដ្ឋខ្មែរដែលជាអ្នកផលិតនិងកសិករផងដែរ។

គួររម្លឹកថាកាលពីថ្មីៗកន្លងទៅ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍អំពាវនាវឱ្យជនរួមជាតិខ្មែរនាំគ្នាប្រើប្រាស់ផលិតផលដែលខ្មែរមាន។ ម្យ៉ាងទៀត រាជរដ្ឋាភិបានក៏បានបិទការនាំចូលទំនិញដូចជា បន្លែ ផ្លែឈើ និងផលិតផលមួយចំនួនពីប្រទេសថៃផងដែរ៕ ចាន់រ៉ា