ស្លាប់​ម្នាក់ និងរបួស​៦​នាក់ក្នុងហេតុការណ៍ផ្ទុះ​ហ្គាស​ឆេះផ្ទះនៅ​ខេត្ត​ Pathum Thani ប្រទេសថៃ

យោងតាមការចេញផ្សាយរបស់សារព័ត៌មាន Khaosod សោកនាដកម្មផ្ទុះហ្គាសមួយកាលពីព្រឹកថ្ងៃទី១១ខែ តុលាក្នុងខេត្ត Pathum Thani ប្រទេសថៃបានបណ្តាលឲ្យមនុស្សម្នាក់ស្លាប់ និង ៦ នាក់ផ្សេងទៀតរងរបួស។

ហេតុការណ៍​នេះ​បាន​កើតឡើង​កាលពី​វេលា​ម៉ោង​៧​និង​១០​នាទី​ព្រឹកនៅ​ចំណុច​ផ្ទះ​មួយ​កន្លែង​ក្នុងភូមិ​Panasan។ បើយោងតាមរបាយការណ៍សង្គ្រោះបន្ទាន់របស់ Fire & Rescue Thailand បានឱ្យដឹងថា ការផ្ទុះនេះគឺបណ្តាលមកពីការលេចធ្លាយឧស្ម័នហ្គាសនៅខាងក្នុងផ្ទះ បណ្តាលផ្ទុះឆេះផ្ទះយ៉ាងឆាប់រហ័ស។

ក្រុមជួយសង្គ្រោះ និងអ្នកពន្លត់អគ្គីភ័យបានប្រញាប់ប្រញាល់ទៅកន្លែងកើតហេតុ ធ្វើការដើម្បីគ្រប់គ្រងអណ្តាតភ្លើង និងជួយសង្គ្រោះអ្នកដែលជាប់នៅខាងក្នុង។ មនុស្ស​ប្រាំមួយ​នាក់​ត្រូវ​បាន​ទាញ​ចេញ​ដោយ​មាន​កម្រិត​ផ្សេង​គ្នា​នៃ​របួស​និង​បាន​បញ្ជូន​ទៅ​កាន់​មន្ទីរពេទ្យ​នៅ​ក្បែរ​នោះ។ ប៉ុន្តែជាអកុសល មនុស្សម្នាក់ត្រូវបានគេប្រទះឃើញស្លាប់នៅខាងក្នុងផ្ទះ។

អាជ្ញាធរកំពុងបើកការស៊ើបអង្កេតដើម្បីកំណត់ពីមូលហេតុពិតប្រាកដនៃការផ្ទុះ និងវាយតម្លៃការខូចខាតរចនាសម្ព័ន្ធដល់ផ្ទះនៅក្បែរនោះ។ មន្ត្រី​មូលដ្ឋាន​ថៃក៏បាន​ជំរុញ​ឲ្យ​ប្រជាពលរដ្ឋ​ពិនិត្យ​ប្រព័ន្ធ​ហ្គាស និង​ឧបករណ៍​ប្រើប្រាស់ផ្ទះបាយ​ជា​ប្រចាំ ដើម្បី​ការពារ​គ្រោះថ្នាក់​ស្រដៀង​គ្នា​នេះ​។

គួរបញ្ជាក់ថាហេតុការណ៍មិនមែនជាហេតុការណ៍គួរឲ្យភ្ញាក់ផ្អើលនោះទេ ខណៈប្រទេសថៃមួយរយៈចុងក្រោយនេះតែងតែជួបហេតុការណ៍ភ្លើងឆេះជាញឹកញាប់ជាពិសេសនៅក្នុងទីក្រុងបាងកក បណ្ដាលឲ្យមានអ្នកស្លាប់ របួសនិងខាតបង់ទ្រព្យសម្បត្តិជាច្រើន៕

អត្ថបទ៖ ប៊ុន សុភាព