ក្រុមជ្រុលនិយមថៃ ធ្វើបាតុកម្មប្រឆាំងវត្តមាន ត្រាំ ក្នុងកិច្ចព្រមព្រៀងសន្តិភាពកម្ពុជា-ថៃ

យោងតាមការចេញផ្សាយរបស់ កាសែត ThaiPost កាលពីថ្ងៃទី ២២ ខែតុលា, ជនជ្រុលនិយមថៃមួយក្រុមមានគ្នា៥០នាក់ បានប្រមូលផ្តុំគ្នានៅស្ថានទូតអាមេរិកក្នុងទីក្រុងបាងកក ដើម្បីប្រឆាំងវត្តមាន របស់ប្រធានាធិបតីអាមេរិក ដូណាល់ ត្រាំ ក្នុងការចុះកិច្ចព្រមព្រៀងសន្តិភាពកម្ពុជា-ថៃ អំឡុងកិច្ចប្រជុំអាស៊ាននៅប្រទេសម៉ាឡេស៊ី។

ក្រុមបាតុករជ្រុលនិយមទាំងនេះ ចាត់ទុកវត្តមានរបស់អាមេរិកថាជាការជ្រៀតជ្រែកនៅក្នុងកិច្ចការផ្ទៃក្នុងរបស់ថៃ ជាពិសេសជម្លោះព្រំដែនកម្ពុជា-ថៃតែម្តង។

ក្រៅពីបាតុកម្មនៅខាងមុខស្ថានទូតអាមេរិកក្នុងប្រទេសថៃនេះហើយ ក្រុម​បាតុករក៏បាន​ដាក់​លិខិត​មួយ​ច្បាប់​ទៅប្រមុខសេតវិមានដោយ​ជំរុញ​ឲ្យ​លោក​ឈប់​ពាក់ព័ន្ធ​ជម្លោះកម្ពុជាថៃនិងទុក​ឲ្យ​​ថៃនិង​កម្ពុជា​ដោះស្រាយ​បញ្ហា​នេះ​តាម​រយៈ​ការ​ចរចាដោយ​ផ្ទាល់។

គួរញ្ជាក់ថាប្រធានាធិបតីអាមេរិក ដូណាល់ ត្រាំ នឹងធ្វើជាអធិបតីក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ដែលគ្រោងនឹងធ្វើឡើងក្នុងកិច្ចប្រជុំអាស៊ានលើកទី ៤៧នៅទីក្រុងគូឡាឡាំពួ ជាមួយនាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៊ីម៕

អត្ថបទ៖ ប៊ុន សុភាព