មិនត្រឹមជាប្រធានអាស៊ានដ៏ល្អ លោក អាន់វ៉ា ឆ្លៀតផ្ដល់ភាពកក់ក្តៅ ឲ្យប្រធាធិបតីប្រេស៊ីល មុនទៅវិញ

ប្រធានាធិបតីប្រេស៊ីល Luiz Inácio Lula da Silva កាលពីយប់ថ្ងៃ២៧ តុលា បានទទួលការភ្ញាក់ផ្អើលដ៏កក់ក្តៅមួយ នៅឯពិធីជប់លៀងអាហារពេលល្ងាចនៃកិច្ចប្រជុំកំពូលអាស៊ានលើកទី៤៧ ដោយប្រារព្ធខួបកំណើតគម្រប់ ៨០ឆ្នាំយ៉ាងស្រស់ស្អាត ក្រោមការរៀបចំពីប្រធានអាស៊ាន លោក អាន់វ៉ា អ៊ីប្រាហ៊ីម ​(Datuk Seri Anwar Ibrahim) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត New Straits Times ព្រឹត្តិការណ៍នេះបានប្រែក្លាយទៅជាពិធីដ៏ឱឡារិកមួយ នៅពេលដែលនាយករដ្ឋមន្ត្រី អាន់វ៉ា បានកាន់ដៃលោក Lula នាំឡើងលើឆាក ដែលបង្កឲ្យមានការអបអរសាទរ និងការច្រៀងចម្រៀងខួបកំណើតរួមជាមួយមេដឹកនាំផ្សេងៗទៀតដែលបង្ហាញវត្តមានក្នុងពិធី។

ក្រោយមក លោក Lula បានប្រើប្រាស់គណនី X (អតីត Twitter) ដើម្បីបង្ហាញពីការដឹងគុណរបស់លោក ចំពោះពីធីខួបកំណើតដ៏កក់ក្តៅពីនាយករដ្ឋមន្ត្រីម៉ាឡេស៊ី  ព្រមទាំងថ្នាក់ដឹកនាំដទៃទៀត។ លោកបានបង្ហោះកាលពីព្រឹកថ្ងៃ២៨តុលាថា «ខ្ញុំសូមបញ្ចប់វត្តមានខ្ញុំក្នុងថ្ងៃនេះ និងនៅក្នុងចំណោមមិត្តភក្តិថ្មី និងដៃគូចាស់ៗដែលខ្ញុំបានជួបនៅទីនេះក្នុងប្រទេសម៉ាឡេស៊ី។ ជាពិសេស ប្រមុខរដ្ឋមកពីអាស៊ីអាគ្នេយ៍ និងប្រទេសដែលត្រូវបានអញ្ជើញ ដែលបានរៀបចំខួបកំណើតដ៏ស្រស់ស្អាតនេះជូនខ្ញុំ។ ខ្ញុំសូមថ្លែងអំណរគុណយ៉ាងជ្រាលជ្រៅចំពោះមេដឹកនាំទាំងអស់។ ខ្ញុំសង្ឃឹមថា នឹងបានជួបពួកគេឆាប់ៗនេះ នៅប្រទេសប្រេស៊ីល»។

គួរបញ្ចាក់ដែរថា លោក អាន់វ៉ា អ៊ីប្រាហ៊ីម ដែលជាប្រធានកិច្ចប្រជុំកំពូលអាស៊ាននៅឆ្នាំនេះ បានដើរតួនាទីជាអ្នកសម្របសម្រួលក្នុងការពិភាក្សា ដែលនាំឲ្យមានកិច្ចព្រមព្រៀងប្រវត្តិសាស្ត្ររវាងប្រទេសកម្ពុជា និងថៃ ឆ្ពោះទៅរកសន្តិភាពព្រមគ្នា។ ជាពិសេស នាយករដ្ឋមន្ត្រីម៉ាឡេស៊ី និង​លោកត្រាំ កាលពីដើមឡើយមក ក៏ជាអ្នក​ជួយ​សម្រុះសម្រួល​បទ​ឈប់​បាញ់​បឋម កាលពី​ថ្ងៃទី២៨ ខែ​កក្កដា ដែលនោះនាំឲ្យប្រជាជនកម្ពុជាចូលរួមសម្ដែងការដឹងគុណនិងអរគុណ ដល់មេដឹកនាំពិភពលោកទាំងពីររូបនេះ យ៉ាងភ្លួកទឹកភ្លូកដី៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ប្រជាជន កម្ពុជា ដឹងគុណលោក អាន់វ៉ា ​​ក្រោយជួយឲ្យមានកិច្ចព្រមព្រៀងសន្តិភាពជាមួយ ថៃ